Зөлфия Минһаҗева кая югалды?

Аның иң популяр җырларыннан берсе, “Миләшкәем”. Аның иҗатын яратмаска мөмкин түгел. Әлеге җырның сүзләрен Алмаз Хәмзин язган, ә инде көе, Зөлфиянең ире Мөхтәр Минһаҗев.

 

Алар искиткеч гаилә, без алар белән 1995 елдан бирле дуслар. Татар эстрадасындагы иң якын дусларыбыз дисәм дә ялгыш булмас. Иш ишен таба дигәндәй, безнең фикерләр, сәнгатькә, гомумән тормышка карашларыбыз туры килә. Без, Мәүлидә белән, алар белән танышканнан бирле бары шатлану һәм кәнәгатьлек хисе генә тоеп яшибез. Очрашып, аралашкан вакытларда гел сәнгать, көнкүреш турында гына сөйләшәбез.

 

Зөлфия бик тә уңган, пехтә, бар нәрсәне дә җиренә җиткереп эшли торган ханым. Чөнки ул бик тә күркәм, тату гаиләдә туып, яхшы тәрбия алып үскән кеше!

Кеше арасында йөргән дәвердә, "Зөлфия кая югалды?" дигән сораулар ишетергә туры килә. Аларның әйтүләренә караганда, артистның сәхнәдәге гомере озын була алмый, һәр нәрсәнең үз вакыты.

 

Чынлап та, хәзер артистлар шулкадәр күбәйделәр ки, тамашачы аларны аралап өлгерә алмый. Хәзерге җырчылар, базардагы сыман, “минем товар әйбәтрәк, минекен ал әле” дип йөргәнне хәтерләтә. Шуңа да, Зөлфия үз заманында матур итеп күренеп алды, халык аны яратты. Кызганычка каршы, тамашачының мәхәббәте мәңгелек була алмый! Мин заманында, Мостай Кәримнең: “Безнең татар тамашачысы, артистны күтәрә, күтәрә, күтәрә дә, башка бер, яңа артистны күреп ала да, монысын җиргә төшереп куерга онытып, тегесе янына йөгерә!” – дигән сүзләрен хәтерлим.

 

Бу, тамашачы Зөлфияне онытып бетерде дигән сүз түгел. Зөлфияне яратучы, аның җырларын тыңлаучылар шактый. Без, Зөлфияне туган көне белән котлыйбыз, без аны яратабыз, хөрмәт итәбез. Чөнки ул моңа лаек, аның кебек тугры дус, тугры хатын, гомумән, яхшы кеше сирәк була! Озын, шатлыклы гомер телисе килә аңа. Мөхтәр белән тигезлектә озак яшәсеннәр! Туган көнең белән, Зөлфия дустыбыз! Якын дусларың, Илсур һәм Мәүлидә!

 

Илсур Мортаза, Татарстанның атказанган артисты