Халык синоптигы Рәис Шәкүров: Караңгырак вакытта төшсәң, котың алына

Без шалтыратканда, Рәис абыйның кәефе күтәренке иде. Кичә генә бәрәңгеләрен казып алганнар, уңышы искитмәле булды, ди ул. Печәннән дә бик канәгать. Бакчасы белән кырдагы азык чөгендере, кәбестәсе әле алынмаган. Кәбестәне тамырда килеш өч тапкыр кырау төшеп өшеткәч кенә алам, алай иткәндә язга кадәр бозылмый тора, тәмле дә була, ди. 

 

Рәис абыйга соңгы тапкыр май башында шалтыраткан идек. Шунда ул, бик бай ел килә, печән белән икмәк уңышы яхшы булачак дигән иде. Ахырдан икмәк бәяләре бик арзан булачак, дип тә өстәп куйды һәм шулай булды да.

 

– Күргән бер кеше, икмәккә бәя төшә дип әйткән идең, фаразың чынга ашты, каян белеп сөйләдең икән, дип үпкәләп тә, орышып та әйтәләр хәзер, – ди көлеп Рәис абый.

 

Бәрәңгесен ел да соң ала ул. Сабагы ямь-яшел булып утырган бәрәңге үсә генә бит, ашыгырга кирәкми, ди. Үзеннән арткан бәрәңгене сата да, күрше районнардан симәнә өчен дә алып китәләр икән. Ә менә фураж бәяләре язга тагын да арзан булыр дип шикләнә. 

– Амбарлар тулы, маллар саны аз. Чәчү чоры бик тиз килеп җитә. Запас частьләр, ашлама, ягулык алырга акча кирәк. Аның өчен мәҗбүри рәвештә ашлыгын сатарга туры киләчәк. 9-10 сумнан сата алсалар, бик яхшы, – ди ул. 

 

Рәис абыйдан берочтан кышка фаразларын да сораштык. Декабрьдә явым-төшем нормада, ә һава температурасы уртача булачак. Гыйнвар белән февраль исә салкын булыр дип көтелә. Кыскасы, борыннарыңны туңдыра торган чын кыш килә. Әйтүенчә, салкынлык -35 градуска да җитәргә мөмкин.

 

– Үзем кыш фасылын яратам. Яздан кышка кадәр эшләп-арып килеп керәсең дә, кышын ял итәсең. Эшләр күпкә кими, җиңеләя. Терлекләрне карап, карлар гына көрисе була. -35 градуста ат җигеп урманга умарталыктагы печәнгә менәргә яратам. Бер-ике атнага җитәрлек кенә итеп, табигать белән хозурланып алып төшәм. Бу матурлыкны рәссам күрсә, кәгазьгә төшерми калмас иде дим. Табигать өчен бик борчылам, сеңлем. Елгалар бик чүпләнде. Без үскәндә, елгага курыкмыйча ялантәпи керә идек. Хәзер аякка пыяла кадалыр дип шикләнәсең. Элек сигез буа гына бар иде. Унөчәр тапкыр су кердек дип мактаныша идек. Каз, кәҗә, сарыклар талның бөтен бөресен ашап бара иде. Хәзер алар булмагач, елга тирәләрен агачлар басты. Ул агачларны кондызлар ега да чүплек ясап китеп бара. Бакча башына караңгырак вакытта төшсәң, котың алына. Кондызлар дөбердәп суга сикерә, агачлар шапылдап ава. Алар бакчадагы чөгендерләргә дә зыян сала. Башта чөгендер яфрагын гына ашыйлар иде, инде төбе белән үк алып китә башладылар. Җәй буе азаплыйлар, – ди ул.