Кәрим Тинчурин театры юбилей гастрольләре оештыра

Татар театрына нигез салучыларның берсе, драматург Кәрим Тинчуринның 135 еллыгы уңае белән Тинчурин театры сентябрьдән декабрьгәчә Татарстан районнары һәм шәһәрләрендә, Россия башкаласы Мәскәүдә спектакльләр күрсәтәчәк.

21 сентябрь – Яшел Үзәндә, 22 сентябрь – Әлкидә, 27 сентябрь – Мамадышта, 28 сентябрь – Арчада, 29 сентябрь – Васильево бистәсендә, 4 октябрьдә – Югары Осланда Пушкин картасы белән “Беренче театр” комедиясе куела. Ә 20 октябрьдә Балык Бистәсенә “Гомер буе сине көтәм” спектаклен алып бару планлаштырыла.

Тинчурин театры артистлары 6 октябрь – Баулы шәһәрендә, 7 октябрь – Азнакай шәһәрендә, 9 ноябрь – Кайбычта, 10 ноябрь – Балтачта, 1 декабрьдә Кукмарада “Кияү урлау” комедиясен күрсәтеләчәк.

Шулай ук 11-12 октябрь көннәрендә Тинчурин театры Чаллы, 13 октябрьдә Түбән Кама шәһәрендә “Кияу урлау”, “Мәхәббәт баскычы”, “Беренче театр” комедияләрен тәкъдим итә.

Болардан тыш Тинчурин театры 26-27 октябрьдә Мәскәүдә чыгыш ясый. Мәскәүләр “Кияү урлау” һәм “Мәдинә” спектакльләрен карый алачак.

2 декабрьдә Саба районы тамашачылары "Туй алдыннан" спектаклен күрәчәк.

Тинчурин театры директоры, Татарстанның атказанган мәдәният хезмәткәре Фәнис Мөсәгыйтов сүзләренчә, иҗади сәфәрләрнең төп максаты – театр ярдәмендә мәктәп укучылары, яшьләр арасында туган телгә, мәдәнияткә мәхәббәт тәрбияләү, милли кыйммәтләрне саклау һәм үстерү, дип хәбәр итә Тинчурин театры матбугат үзәге.

Билетларны әлеге сылтама аша сатып алырга мөмкин: https://tinchurinteatr.ru/ru/shows/