18.09.2022 Мәдәният

Бүген танылган сәхнә остасы Алмаз Хәмзинга 75 яшь тулды (ТАРИХИ ФОТОЛАР)

Бүген – 18 сентябрьдә җырчы, конферансье, режиссер, популяр көйләр авторы, Татарстанның атказанган сәнгать эшлеклесе Алмаз Хәмзинга 75 яшь! Сәхнә остасын күркәм юбилее белән тәбрик итәбез, аңа саулык-сәламәтлек, озын гомер, имин тормыш һәм әле озак еллар яраткан тамашачысын үзенең чыгышлары, иҗаты белән сөендереп яшәвен телибез.

Алмаз Хәмзин Татарстанның Түбән Кама районы Ташлык авылында туып үсә. 1977 елда Казан Дәүләт педагогия институтының музыка факультетын тәмамлый. Студент елларында ук ул Рәфкать Гомәров җитәкләгән «Саз» ансамблендә (1971-1984) җырлый башлый. Ул соңрак төрле елларда Казанда Куйбышев исемендәге Мәдәният сараенда директор урынбасары, «Комсомолец» клубында – директор булып эшли. «Татарстан» телерадиокомпаниясендә – мөхәррир һәм күпсанлы сценарийлар авторы була, «Алмаз плюс», «Шаяру», «Шаян сәхнә», «Капка төбе» һ.б. тапшыруларны оештырып җибәрә. Сәхнәдә йөзләгән концертларның алып баручысы була.

А.Хәмзин 1979-1980, 1996-2000 елларда Габдулла Тукай исемендәге Татар дәүләт филармониясендә – җырчы, режиссер, конферансье, алып баручы булып эшли; 2005 - 2009 елларда Казан театр училищесының татар эстрада бүлеге җитәкчесе, мөгаллиме була. 2009-2013 елларда «Казан утлары» журналының бүлек мөхәррире; бүгенге көндә «Чаян» журналында бүлек мөхәррире, язучы.

А.Хәмзин бик күп җырлар («Зәйтүнәм», «Өмет», «Миләшкәем», «Туган көн», «Сине көтәм» һ.б.), эстрада өчен юмористик хикәяләр авторы, шулай ук монологлар, пьесалар иҗат итә. 2000 елда А.Хәмзиннең «Матбугат йорты» нәшриятында «Мәктәп балалары өчен җырлар», 2007 елда Татарстан китап нәшриятында «Озак яшисегез килсә...» дигән китаплары басылып чыга. 2008 елдан Татарстан Язучылар берлеге әгъзасы. 2008 елның 25 гыйнварында Татарстан Республикасы Президенты М.Ш.Шәймиев Указы нигезендә аңа татар мәдәниятен һәм сәнгатен үстерүдәге казанышлары өчен «Татарстан Республикасының атказанган сәнгать эшлеклесе» дигән мактаулы исем бирелә.