Эстраданың кызыктыргыч кәләшләре

Хәтерләсәгез, «Шәһри Казан»ның алдагы бер саннарында без татар эстрадасының өйләнмәгән егетләре, ягъни кызыктыргыч кияүләре турында язып чыккан идек. Инде чират туташларга җитте. Аңлагансыздыр, бүгенге сүзебез кәләшләр турында.

«Кызыктыргыч кәләшләр» рейтингын Нурзадә ачып җибәрде. Җырчының үзенә әлеге хакта хәбәр иткәч, ул бик нык аптырашта калса да, мондый рейтингка керүемә яхшы карыйм, диде. «Мин бер кеше белән никах укыткан идем бит, әмма туйга кадәр барып җитмәде. Аерылыштык. Сүз дә юк, төрле вакытлар була. Ялгызыңа гына авыр булган чаклар да юк түгел. Сөйләшердәй, серләшердәй, киңәшләшердәй якын кешең булса, яхшы инде», – диде. Шулай да якын киләчәктә гаилә кору турында сорау биргәч, белмим инде, дип серле генә елмаеп җавап бирде. Димәк, Нурзадә өчен барысы да алда әле.

32 яшен тутырса да, Алинә Шәрибҗанованың да атсыз бармагында балдак ялтырамый. Әлегә. Кем белә, ә бәлки, үзенчәлекле тавышка ия җырчыбыз якын киләчәктә кияүгә дә чыгып куяр. «Кияүгә чыгу, бала тәрбияләү турында уйламаган хатын-кыз юктыр инде ул. Минем дә планда юк түгел. Хәтта яраткан кешем дә бар. Без аның белән өч ел җитди очрашабыз. Аның үз эше бар. Әмма фикер каршылыгы булу сәбәпле, мөнәсәбәтләребезне генә рәсмиләштермәдек. Ул, әлбәттә, минем җырчы булуым белән горурлана, әмма ерак сәфәрләргә, гастрольләргә баруымны, ял көннәрен бергә үткәрә алмавыбызны аңлап бетерә алмый», – ди Алинә. Җырчы фикеренчә, артист булу авыр. Шуңа күрә аның янәшәсендә беренче чиратта матди яктан тәэмин ителгән акыллы кеше булырга тиеш. Кирәк вакытта акчалата ярдәм дә итәрдәй булсын. Шул ук вакытта сайланган ярның сәхнә тормышын аңлавы да мөһим. Һәр кеше күңелендә озак саклана торган матур туй үткәрү, акчаң җиткән генә түгел, ә күңелең теләгән, хыялыңда йөрткән күлмәк сатып алу да мөһим Алинә өчен.

Өченче урында – «Зө-ләй-лә» төркеме солисты Ләйсән Закирова. Аның өчен иң мөһиме – булачак тормыш иптәшенең гадел, юмарт, юмор сөючән, эшлекле һәм чибәр булуы. Шулай ук өлкәннәрне хөрмәт итүе һәм хайваннар яратуы да соңгы урында булырга тиеш түгел. «Кияүгә чыгарга бик телим, әлбәттә. Әмма шулай язгандыр, әлегә кадәр насыйп ярымны очратмадым. Очрашып йөргән егетләрем булды, әмма гаилә коруга кадәр барып җитә алмадык», – диде безгә мөлаем туташ.

25 яшьлек Алинә Сафиуллина да гаилә кирәк дип саный, әмма ул аңа бик җитди карый, егетләргә дә таләпчән икән. «Хәзер яшьләр өйләнешәләр дә озак та узмый аерылышалар. Ә мин 100 тапкыр уйлый торган кеше, әле алай да фикеремнән кире кайтырга мөмкинмен. Мин хисчән кеше, вак-төяктән дә күңелем кайтырга мөмкин. Кыскасы, егетләргә минем белән җиңел түгел. Әлеге вакытта сөйләшеп йөргән дус егетем бар. Ә булачак тормыш иптәшем хатын-кызны ихтирам итәргә, үз-үзе турында гына уйламаска тиеш», – диде Алинә безгә.      

Берничә ел җитди очрашып йөргән егете булса да, 22 яшьлек җырчы Диләрә Илалетдинова кияүгә чыгарга ашыкмый әле. Укуны тәмамлыйсым бар, ди ул. Ә булачак тормыш иптәше иң беренче чиратта тәртипле, тырыш, гаиләне алып бара ала торган кеше булырга тиеш дигән таләпләр куя. Туташ фикеренчә, ярату белән генә гаилә корып булмый, бер-береңне аңларга һәм хөрмәт итәргә кирәк.

Моннан тыш, әлеге рейтингка Иркә, Альбина Апанаева һәм Асылъяр да керде.