Тинчурин театрында “Ал яулык, зәңгәр шәл” спектакленең премьерасы үтте (ФОТО)

«Умай» – татар театры тарихында беренче феминистик лаборатория. Татар мәдәниятендә хатын-кызның тоткан ролен һәм хатын-кызның дөньяга карашын чагылдырган әлеге үзенчәлекле лабораториянең эшчәнлек нәтиҗәсе буларак татар телендә өч кыска камера операсы язылды. Опералар татар хатын-кызларының татар мәгърифәтенә һәм тарихи үзгәртеп коруларга керткән өлешенә багышланды. Сюжеты исә татар мифологиясеннән, җәдитчелек чорындагы татарларның тормыш-көнкүрешеннән алынган. Биредә шулай ук хәзерге заманның көрәшче хатын-кызларының язмышы да чагыла.

 

«Ал яулык, зәңгәр шәл» өч бүлекле операсының барлык авторлары – шагыйрәләр, хатын-кыз композиторлар һәм драматурглар. Операның композиторлары – Алсу Сөнгатуллина, Алинә Кәримова, Анастасия Костюкова; режиссерлары – Илнур Гарифуллин, Камил Гатауллин, Булат Минкин, Рамил Камалов; музыка җитәкчесе һәм дирижеры – Ильяс Камал, хормейстеры – Алия Хәмзина, концертмейстеры – Ләйлә Хәсәнова, хореографы – Марсель Нуриев, ут кую буенча рәссамы – Илдар Шакиров.

 

Операда катнашкан барлык актерлар – Тинчурин театры артистлары. Премьерага килгән барлык тамашачылар да, шул исәптән, Республикабызның танылган сәнгать әһелләре һәм күренекле шәхесләре дә аларның ихлас уенын, үз партияләрен башкару сәләтен югары бәяләделәр, көчле алкышларга күмделәр.

 

Премьера белән спектакльнең иҗат төркемен кайнар котлыйбыз һәм хөрмәтле тамашачыларыбызны исә киләсе сезонда да көтеп калабыз.