28.04.2022 Шоу-бизнес

Марат Мухин: "Ураза тотмагач, ифтарга барудан ни мәгънә?"

Беркөнне танылган аранжировщик, композитор Марат Мухинны очраттым. Дусты чакыруы буенча ифтарга барышы икән. Бу уңайдан Маратка берничә сорау бирдем. Ашыкса да, сөйләшеп торырга вакыт тапты, рәхмәт төшкере.

- Марат, бу арада ифтардан ифтарга гына йөрисең. Сез дә үткәрдегезме?

- Әйе, дуслар да, коллегалар да үткәрә, еш чакыралар. Без үзебез дә 21 апрельдә “Һава” мәчетендә ифтар уздырдык.

- Ни өчен нәкъ менә “Һава” мәчетендә?

- 9 апрель көнне дусларыбыз Миләүшә һәм Данир Сабировлар шушы мәчеттә ифтар үткәрде. Ул мәҗлестә без дә булдык. Бик ошады, ашау да тәмле булды. Шуңа күрә үзебезнең гаилә исеменнән шушы мәчеттә ифтар үткәрергә уйладык.

- Ел да Ураза тотасыңмы?

- Дөресен генә әйткәндә, узган ел да, быел да башыннан ахырына кадәр тотмадым. Кайбер көнне тотып була, кайбер көннәрдә Ураза тотып эшләве кыен.

- Ифтарга чакырылган көннәрдә Ураза тотасыңмы соң?

- Әлбәттә. Алайса ифтарга барудан ни мәгънә?

- Артистлар әле дә сиңа чират торамы?

- Гадәттәгечә инде, җитәрлек (көлә).

- Хәзерге вакытта кемнең җырына аранжировка ясыйсың?

- Алсу һәм Азат Фазлыевларга, Әнвәр Нургалиевка үзем иҗат иткән җырны эшли башладым. Фирдүс Тямаевка, Рифат Зариповка әниләребезгә багышланган бик матур җыр яздым. Зөлфәт Хәкимнең берничә яңа җырын эшлисе бар. Филүс Каһировка, Ришат Төхвәтуллинга яңа җырлар язасы килә.

- Бер елны Казанда синең җырлардан торган зур концерт булган иде. Кабат концерт куярга планлаштырмыйсыңмы?

- Беренче зур концертым 2019 елның сентябрендә булды. Анда бик күп танылган артистлар катнашты. Быел да сентябрь аенда концерт куярга уйлап торам, Аллаһы боерса.

- Концерт оештыруда иң кыены нәрсә?

- Артистларны бер көнгә туплау – үзе бер зур эш. Программа өстендә эшләргә әлегә вакыт булмаса да, артистлар составын җыйдым.

Эльвира ШАКИРОВА
Шәһри Казан
№ --- | 28.04.2022