15 апрель көнне Г.Тукай әдәби музеена керү бушлай булачак

15 апрельдә бөтен дөньяда шагыйрь Габдулла Тукайны искә алу чаралары уза. Казанда искә алу чарасы Яңа Татар бистәсе зиратында шагыйрь каберенә чәчәкләр салудан башланачак. Истәлекле чаралар Тукай әдәби музеенда дәвам итәчәк. 15 апрель көнне музейга керү бушлай булачак.

11.00 сәгатьтә Музейда әдәби-музыкаль кичә башлана. Чарада Россиянең атказанган артисты Дания Нуруллина, Татарстанның халык артистлары Луара Шакирҗанова, Фоат Әбүбәкеров һәм Искәндәр Биктаһиров, Татарстанның атказанган артистлары Әхмәт Кәримов, Раил Шәмсуаров һәм Илнур Закиров, Халыкара конкурслар лауреатлары Айгөл Зәйнуллина һәм Розалия Зәкиева, Казан музыка көллияте студентлары Миләүшә Закирова, Илсаф Гыйльметдинов һәм Рөстәм Егоров чыгыш ясаячак.

12.00 сәгатьтә шагыйрьнең шәхси әйберләреннән торган күргәзмә эшлиячәк. Бу предметлар – музейның иң кыйммәтле һәм кызыклы экспонатлары. Алар арасында фаянс шкатулка, үрелгән юл кәрҗине, сөлге, түбәтәй, карандаш өчен металл стакан һәм башкасы бар. Экскурсия барышында кунаклар шагыйрьнең тормышында бу әйберләрнең барлыкка килүе һәм аларның музей фондларына керү тарихы турында беләчәкләр. Шулай ук Тукайның исән калган басмалары һәм фотосурәтләре, шагыйрь редакцияләре белән хезмәттәшлек иткән газеталар һәм журналлар, Тукай даирәсендәге кешеләрнең шәхси әйберләре һәм документлары турында сүз барачак.

14.00 сәгатьтә музейның балалар үзәгендә мәктәп укучылар өчен чаралар узачак.