Усман Әлмиев, Гөлназ Рәхмәтуллина һәм Илдус Фәиз Яңа ел турында

2011 – Куян елы. Бу елда туучылар (1927, 1939, 1951, 1963, 1975, 1987, 1999) – бәхәсләрдән ерак торучы, тынычлык, төгәллек яратучы, кунакчыл кешеләр. Аларны беренче чиратта гаилә иминлеге кызыксындыра. Ялгызлыктан бик куркалар. Гаиләләре булуны иң зур бәхеткә саныйлар. Ә карьера, акча, дәрәҗәне икенче планга калдыралар. Шулай да, әкренләп үз дигәннәренә ирешәләр.

Бәйрәм кичәсенә килгәндә, куяннар төрле төстә булган кебек, костюм сайлауда да мөмкинлекләр зур: ак, кара, соры... Мехтан эшләнгән кием кию дә отышлы. Куян булып киенергә мөмкинлегегез бар икән, бәйрәмдәгеләрнең кәефен тагын да күтәрерсез. Табынга килгәндә, вегетариан ризыкларга, җиләк-җимештән исә алмага өстенлек бирү отышлы. Әмма кыздырылган, пешкән куян ите куярга киңәш ителми. Ә чыршы төбендә Куян елы хөрмәтенә бер бәйләм кишер тору зарур.

Куян елында туучыларның Яңа 2011 елга максатлары нинди икән?

Усман ӘЛМИЕВ, җырчы:

– Куян елында туучылар кебек, мин дә гаилә җанлы, бик тыныч кеше. Ачу-үпкә сакларга яратмыйм.

Киләсе елга миңа 96 яшь тула. 100 гә якынлашып килгәндә, әллә нинди зур планнар корып, өметләр баглап яту килешмәс (көлә). Иң мөһиме – Аллаһы Тәгаләдән сәламәтлек, тынычлык сорыйм. Башка зур кайгылар төшмәсен иде. Алар сәламәтлекне какшата.

Кәефем картларча. Авырып торам әле. Яңа елда әллә кайларга барырга план кормыйм. Карлы-бозлы юллар бик куркыта. Егылсаң, тора да алмассың. Гомумән, яшьрәк чакта да гел өйдә каршылау яклы идем. Махсус кунаклар чакырмыйм. Теләгәннәр өчен ишек ачык. Яңа ел табынына гел пылау пешерәм. Ул бик тәмле килеп чыга. Табынны матур итеп әзерләп, Яңа ел сәгатьләре 12 не сукканда ил башлыкларының әйткән теләкләрен игътибар белән тыңлыйм.

Яңа елны ничек каршы алсаң, шулай дәвам итә, диләр. Мондый ырымнарга ышанам. Шуңа шат, күтәренке күңел, изге ниятләр белән каршы алырга кирәк. Билгеле, бәйрәм узуга котырып бәяләр үсәчәк. Әмма аңа карап кына көрсенеп булмый. Бу бездән тормый. Ходайдан соңгы Яңа елым булмасын иде, дип сорыйм.

Гөлназ РӘХМӘТУЛЛИНА, “Хәерле иртә!” тапшыруы алып баручысы:

– Яңа елны өйдә, балалар һәм әти-әниләр белән бергәләшеп каршылыйбыз. Ел саен декабрь башында ук чыршы бизәп куябыз. Базарга чыгып, чын чыршы алабыз. Аның хуш исе күңелгә рәхәтлек өсти.

Куян елы – минем елым булса да, аерым өстенлекләрен күрмим, әллә ни зур планнар кормыйм. Ырымнарга да ышанмыйм. Тормышымнан канәгать, барысы да бар, Аллага шөкер. Ходайдан гаилә бәхете, туганнарыма, якыннарыма исәнлек сорыйм. Имин, тыныч тормышта яшик!

Илдус ФӘИЗ, Татарстан диния нәзарәте рәисенең беренче урынбасары, Болгар мәчете имам-хатибы:

– Елларны Куян, Ат, Сарыкныкына бүлеп карамыйм, моның белән кызыксынмыйм, бу миңа ят нәрсә. Нинди генә ел булса да, барысы да Аллаһы Тәгалә биргән бер вакыт, бер гомер. Куян елында шулай булачак, монысында болай дип тормыш алып бармыйм. Ислам кануннары, аның календаре буенча яшим. Шуңа Яңа ел киченә дә исем китми. Миңа исламга бәйле бәйрәмнәр мөһим: Гает, Корбан, Мәүлет, Җомга көне һәм башкалар.

Бәйрәмнәрдән кеше үзенә ямь таба икән, үткәрә инде. Бу – һәркемнең шәхси фикере. Әмма һәр очракта Аллаһы Тәгалә фикерен өстен куярга, аның кушканнарын үтәргә, хәрәмнән тыелырга кирәк. Газета-журналларны актарсаң, телевизорга күз салсаң, нинди генә киңәш бирмиләр: табынга анысын куегыз, монысын куймагыз, диләр. Ризыктан өстен булырга ярамый. Нәрсә бар, шуңа риза булырга кирәк. Хәзер, Аллага шөкер, мул тормышта яшибез.