|
|
Бүген кемнәр туган
|
|
Архив
|
29.03.2022 Җәмгыять
Алар әле дә аны кайтыр дип көтә...Узган атнада Украинадагы хәрби операция вакытында тагын өч якташыбызның һәлак булганы ачыкланды. Илдар Галиев Балтач районыннан. 2002 елгы егетнең үлеме бар районны тетрәндергән. Гаиләдә алар өч бала. Ике кечкенә сеңлесе әле дә абыйсын кайтыр дип көтә. — Илдар бик акыллы, тырыш гаиләдән. Әнисе кибетче, әтисе юл төзелешендә эшли. Күп балалы гаилә буларак, Галиевлар җир алып, йорт салып чыкты. Илдар оста чаңгычы иде. Аны әнисенең туган авылы Көшкәтбашта җирләделәр. Барыбыз өчен зур югалту бу, — диделәр Балтач авылы җирле үзидарәсендә. Кукмарадан 24 яшьлек Айнур Измайловның үлгән дигән хәбәре узган атнада ук социаль челтәрләрдә таралган иде. Айнур шулай ук күп балалы гаиләдән. Өч малай — барысы да хәрбиләр. — Айнурны инглиз теленнән укыттым. Ул бик игелекле, һәрчак позитив, актив, ярдәмчел укучы булды. Самбо белән шөгыльләнә иде. Айнур — безнең өчен герой. Мәктәпкә аның исемен бирергә һәм музейда аңа багышлап почмак булдырырга ниятлибез, — ди Айнур укыган Кукмара районы 3 нче мәктәп директоры урынбасары Гөлшат Шәймәрданова.
21 яшьлек Артур Шәрәфиев Чаллыдан. Иптәшләре аны тормышны яратучы, актив, авырлыклар алдында сынмый, сыгылмый торган, көчле, ярдәмчел дус иде дип искә ала. Хәрби хезмәттән кайткач, гадел хезмәт күрсәтә торган автосервис ачарга хыялланган ул. Чаллы политехника көллиятен кызыл дипломга тәмамлаган. Әнисе озак еллар хокук саклау органнарында эшләгән. Артур былтыр килешү нигезендә хезмәт итәргә алынган.
Каһарман якташларыбызның урыннары җәннәттә булсын. Якыннарына сабырлык телибез.
Фото: пиксабай
Эльвира МОЗАФФАРОВА |
Иң күп укылган
|