|
|
Бүген кемнәр туган
|
|
Архив
|
20.03.2022 Мәдәният
Флүрә Талипова: Тормышым каршылыклы булдыЧаллыда яшәп иҗат итүче автор-башкаручы Флүрә Талипова-Коләхмәтова белән күрешеп әңгәмә корганыбызга шактый еллар узган икән. “Хата”бызны төзәттек. Флүрә апа шушы көннәрдә Казанга иҗат эшләре белән килде. Ун ел элек күрешкәндә нинди булса, хәзер дә шул ук. "Туңдыргычта сакланадыр”, — диләр андыйлар турында. — Флүрә апа, соңгы вакытта бик ишетелмисез. — Аллага шөкер, сау-сәламәт, исән-имин яшәп ятам. Сәламәтлек булса, кәеф тә әйбәт. Әйе, иҗат юлын башлаганда телевидение-радиода азмы-күпме күренгәләдем, ишетелгәләдем, Казанда концерт та куйдым. Соңгы елларда башкалада концерт куя алмасам да, Чаллыда ел саен уза.
— Сез бит җырлар да язасыз.
— Иҗаттан туктаганым булмады, һаман шунда кайныйм. Соңгы арада шагыйрьләр үзләре мине табып, шигырьләренә көй яздыра.
— Фәлсәфи җырларыгыз да күп.
— Тормыш — үзе көрәш, фәлсәфә бит ул. Холык-фигылем буенча уйлана, каршылык ярата торган кеше мин. Тормышым да каршылыклы булды дияр идем. Ни гаҗәп, алар иҗатка этәргеч, яшәргә көч бирә. Каршылыкларны җиңә-җиңә алга омтылам. Иҗатта үз юнәлешем бар, үземә генә хас темаларны күтәреп чыгам. Минемчә уйлаган, юнәлешемне үз иткән тамашачы бик аз, әмма андыйлар бар.
— Гармунны кулга еш аласызмы?
— Гармун уйнау балачак хыялым иде. Шуны гомерем буе тормышка ашырам, камилләшергә тырышам. Гармун белән ничәмә йөз көй язылгандыр... Үз гомеремдә дүрт гармуным булды. Тавышыма туры китереп, яңа концерт гармуны эшләтәсем килә. Сайларга мөмкинлек юк, әйбәт гармун кыйммәт.
— Гаилә хәлегездә үзгәрешләр юкмы соң?
— Шәхси тормышымда бар да элеккечә. Ике улым — гаиләм. Олысы Илшат Казахстанда югары белем алды, эшли. Өйләнергә генә бик ашыкмый. Кече улым Илгиз Чаллы сәнгать көллиятенең баян бүлеген тәмамлады. Бүген армия сафларында хезмәт итә, җәйгә кайтуын түземсезлек белән көтәбез. Музыка буенча укуын дәвам итәрме, юкмы — аның ихтыярында. Үзем, әлбәттә, шушы юлдан китүен бик телим.
— Әтиләре белән күрешәләрме?
— Улларымның әтисе исән-сау. Аның белән аралашуга беркайчан киртә куймадым. Балалар үстергәндә терәк бик кирәк булгандыр да, инде улларым хәзер үзләре ир-егет булды.
— Газета укучыларга нинди теләкләр җиткерерсез?
— Беркайчан да өметсезлеккә бирелмәгез, оптимист булыгыз, ихтыяр көчен ныгытыгыз, үзегезне яратыгыз. Ничә яшьтә булуга карамастан, максат куегыз һәм үзегезне жәлләмәгез, шуңа ирешегез! Ә минем максат — иҗатыма 20 ел тулу уңаеннан, иҗатташ дусларым белән берлектә Татарстан һәм Башкортстанда зур чара уздыру.
Лилия ЙОСЫПОВА |
Иң күп укылган
|