Ә бүләккә ни була?

Табигать кышкыга охшамаса да, Яңа ел барыбер якынлаша. Димәк, бүләк сайлар вакыт җитә. Ул матур да, кирәкле дә булырга тиеш. Ә иң мөһиме – кесәгә дә сукмасын. Ә сез якыннарыгыз өчен бүләк әзерли башладыгызмы?

Рафис Хәбибуллин, Татарстанның гадәттән тыш хәлләр министры:

– Дөресен генә әйткәндә, ул хакта уйлаган да юк әле. Әмма борчылмыйм, безнең өчен бүләк сайлау ике сәгатьлек эш инде. Андый мәсьәләләрне тиз хәл итәм мин. Балаларга гадәттә кием-салым алам, ә хәләл җефетемә бу юлы нәрсә буласын әлегә уйламадым.

Лидия Кириянова, “Комсомольская правда” газетасы хәбәрчесе:

– Әлегә сайламадым, әмма һичшиксез булачак. Үзем, мәсәлән, Яңа елга берәрсе белән кая да булса барырмын дип торам. Бәлки йөзек һәм чылбыр ише әйберләр алырмын. Әмма бәясе 4,5 мең сумнан артмаска тиеш. Улыма навигатор кирәк иде, әмма ул аны алды инде. Шуңа күрә уйларга кирәк булачак. Әмма бу бүләк кирәкле нәрсә булырга тиеш. Әти-әниләремә гадәттә аларның икесенә кирәкле әйберләр алам. Узган ел, мәсәлән, видеотехника бүләк иткән идем. Монысы тагын 5 меңгә төшәчәк. Кризис дисезме? Юк, игътисадый кыенлыклар Яңа ел кебек бәйрәмнәргә йогынты ясамаска тиеш дип уйлыйм.

Айрат Хәкимов, “Болгар” мөселман стоматология клиникасы баш табибы, Татарстан Диния нәзарәтенең медицина бүлеге мөдире:

– Хәзер ел бетә инде, быелга зур эш башламыйча торам әле, диючеләр бар. Ә минем өчен 31 декабрь календарьдагы чираттагы дата гына. Аның башка көннәрдән бер үзенчәлеген дә күрмим. Ул көнне, гадәттәгечә, кичке тугызларда эштән кайтып керәм. 1 гыйнварда эшкә бармыйм, чөнки хезмәттәшләремнең барысы да ял итә. 2 се көнне көндәгечә эшкә китәм. “Яңа ел каникулы” дигән нәрсә безгә кагылмый. Мөселман гаиләсенә чыршы бизәү хәрәм, шуңа күрә андый нәрсә белән шөгыльләнмибез. Ә менә балаларның күңелләрен күрәбез: бүләкләр ясыйбыз.

Мидхәт Шәрифуллин, Татарстан Президенты каршындагы дәүләт торак фонды җитәкчесе киңәшчесе:

– Яңа елга әзерләнә башламадым әле. Эш бик күп. Республика халкыннан торак төзелешенә кагылышлы сораулар бик күп килә. Аларга җавап бирергә кирәк. Салына башлаган йортларны өлгертеп, фатир ияләренә Яңа ел бәйрәменә ачкыч бирә алсак, моннан да зур бүләк булмас иде, минемчә. Ә инде гаиләгә килгәндә, алар өчен бүләк булачак. Аны мин берничә көн калгач кына алам. Ике оныгым да дәү әтидән сюрприз көтә. Аларга нәрсә алып бирергә икән, дип уйлана башладык инде. Туганнарны, якын дусларны да котларга исәп.

Тәслимә ТАҖЕТДИНОВА, укытучы:

– Яңа елга алдан ук әзерләнәм. Чөнки ел ахырында мәктәптә мәшәкатьләр болай да арта. Балалар белән бәйрәм чарасы әзерлибез, уку чиреге тәмамлана. Бүләк сайлап йөрергә вакыт юк. Ә быел якыннарыма һәм туганнарыма үзенчәлекле бүләк ясарга җыенам. Киләсе ел – Ак куян елы бит. Барысына куян йоныннан бәйләнгән оекбаш-бияләйләр сатып алдым. Җылы да, файдалы да бүләк булачак. Кыйммәт тә түгел, оекбаш – 150, бияләй 180-200 сум тора.