|
|
Бүген кемнәр туган
|
|
Архив
|
11.12.2010 Дин
Зәен Маһир – ислам музыкасының яңа суперйолдызыХалкыбызның музыкаль сферага битараф түгеллеге бөтенебезгә мәгълүм. Хәзер исә музыка өлкәсендә динебез белән бәйле сегмент та калыпланып килә. Татар мохитендә инде шул юнәлештә эшләргә тырышкан, һич югында максат куйган профессионаллар да хасил булды. Әмма аларның иҗат җимешләре әлегә бармак белән генә санарлык. Мондый ситуациядә ирексездән башка халыкларның тәҗрибәсенә мөрәҗәгать итү табигый. Укучыларга без Зәен Маһир исемле башкаручының иҗатын тәкъдим итәргә булдык. Аның турында шундый мәгълүмат җиткерә алабыз: ул 1981 елгы, чыгышы белән Ливанның Триполи шәһәреннән, бүген исә Швециянең башкаласы – Стокгольмда яши һәм иҗат итә. Аның беренче альбомына 13 композиция кергән. Альбом исеме үк – “Рәхмәт Сиңа, Аллаһ!” – аның иҗат программасын чагылдыра. Альбом 2009 елның 1 ноябрендә тәкъдим ителгән. Аның җырлы клипларын интернетта карарга була, алар бик популяр, үткән арада, мәсәлән, YouTube та миллионлап караучылар булган. Биографиясенә килгәндә исә, аның әтисе Мостафа Маһир Ливанның Триполи шәһәрендә җырчы булып эшләгән. Швециягә күченгәндә Зәенгә 8 яшь генә була. Университетта белем ала, белгечлеге буенча – авиацион техник. Үсмер чактан ук үзешчән рәвештә дуслары белән музыкаль группаларда шөгыльләнергә ярата. Беренче музыкаль инструментны аңа 10 яшендә алып бирәләр. Эшчәнлеген ул башта музыкаль продюсер буларак башлый, Ню-Йоркта да хезмәт итә. Әмма шушы сферадагы гадәтләр, әхлаксызлык белән килешә алмый. Аннары ул дингә ныклап мөрәҗәгать итә һәм Швециягә кире кайтып 2009 январеннән үзенең альбомын чыгаруга тырышлык куя. Альбомы уңышны казана, җырчы Якын Көнчыгышта, АКШта һәм башка бик күп илләрдә гастрольләрдә була. Әмма иң зур популярлыкны Малайзиядә казана. Малайзиядә альбомы платиналы булуга ирешә. “Иң яхшы дини җыр” номинациядә Зәен берничә музыкаль конкурста җиңүче дип табыла. Аның уңышын шуннан да күзгә китерергә була: фейсбукта бер ел эчендә фанатлары саны бер миллионнан ашкан. Безнең өчен Зәен иҗаты гыйбрәтле булырга бик мөмкин. Күпчелек җырлары инглиз телендә, җиңел аңлашылалар. Видеоклипларда инглизчә юллары ук куелган. Клиплары тәрбияви яктан да бик файдалы: гөнаһтан арыну, яхшылыкка омтылуга чакыручан. Һәм эшләнеш сыйфаты да бик бгары, заманави. Җырчының аудио-видеоларын бик җиңел табырга мөмкин: Maher Zain исеме буенча интернетның күп сайтларында алар урынлашкан, контактта һәм фейсбукта да бөтенесе бар. Зәенне хәзер ислам музыкасында яшь суперйолдыз дияргә була. Без, татарларда да, якын арада шундый мәгънәле, хәләл музыка әйберләре хасил булыр дип ышанасы кала. Бездә дә үтүче музыкаль конкурс-бәйгеләрдә дистәләгән номинацияләр арасында “дини җыр” исемлесен дә күрергә насыйп булсын иде.
Мөхсин ВАХИТОВ |
Иң күп укылган
|