31.01.2022 Шоу-бизнес

Җырчы Фирүзә Париж, сәхнә эшен ташлап, Польшага китеп барган

Уфада яшәп иҗат иткән җырчы Фирүзә Париж (үз фамилиясе — Аллаярова — Л.Й.), шәһәр читендәге яңа йортын бикләп, сәхнә эшен калдырып, Польшага китеп барган. Инде биш ай Краков шәһәрендә тора ул. Эшне дә тиз тапкан.

— Тәүге тапкыр Варшава аэропортына килеп төшүгә, мондагы мохит үзенә җәлеп итте. Күптән биредә яшим кебек тоелды, — ди Фирүзә. — Шәһәрнең аурасы, культурасы, халкының энергетикасы әйбәт. Урамда елмаеп узалар. Шуңадыр, бик тиз ияләштем. Үземне чит ил кешесе кебек хис итмим. Польшада озагракка калу өчен, документ эшләрен тәртипкә салып йөрим.

— Фирүзә, әле күптән түгел генә ремонт эшләре белән мәш килә идең. Ничек Польшага киттең?

— Берәр Европа иленә китеп яшәү турында күптәннән хыялландым. Йорт алдым. Аннары пандемия башланды, иң зур зыянны артистлар күрде: концертлар, мәҗлесләр тукталды. Бер-ике ел шулай утырдым да, болай булмый, дип эзләнә башладым. Башта Испанияне карадым. Әмма күп илгә виза алып булмый, чикләр ябык иде. Шулай туры килде, китәргә дип карар кылгач, көтмәгәндә Польшада яшәүче танышым Людмиладан чакыру алдым. Виза да җайлы эшләнде. Ике чемоданымны тутырдым да Мәскәү аша башта 4 сәгатькә якын — Варшавага, аннан соң 1,5 сәгать Краковка очтым. Бу шәһәр башкаладан бераз кечерәк. Узган елның август азагыннан биредә яшим. Виза вакыты тәмамланды. Хәзер яшәүгә рөхсәт (вид на жительство) документлары артыннан йөрим.

— Улың Кинйә янәшәңдә иде. Ул хәзер кайда?

— Кинйә былтыр Казанга күченде, көллияткә укырга керде. Хәзер ул кызым һәм киявем янәшәсендә. Балаларым өчен күңел тыныч, алар бергә. Кинйә Казанга киткәч, йортта берүзем калдым, ямансу булды. Бәлки, чит илгә китү теләген шул да тизләткәндер. Тормышта, гомумән, тәвәккәл кеше мин. Берәр уй кердеме, чынга ашырмыйча туктамыйм.

— Фирүзә, син иҗат кешесе. Күңел сәхнәгә тартыламы?

— Әгәр исән-имин булып, биредәге тормыш шулай җайлы дәвам итсә, Россиядән Польшага килеп урнашкан милләттәшләрне җыеп, татар-башкорт оешмасы булдырып, киләчәктә Сабантуйлар уздыру, төрле очрашулар оештыру хыялы бар. Вакыт күрсәтер.

— Уй-ниятләрең чынга ашсын!

— Рәхмәт. Барыбыз да исән-сау булыйк!

Лилия ЙОСЫПОВА
Ирек мәйданы
№ --- | 31.01.2022