29.01.2022 Бәйге

«Блогер.Татар» бәйгесе җиңүчеләрен бүләкләү тантанасы ничек узды (ФОТО, ВИДЕО)

Кичә Казанда «Блогер.Татар» республикакүләм бәйгесе җиңүчеләрен бүләкләделәр. Авыллар темасына багышланган Икенче бәйге һәм гаилә темасына багышланган Өченче бәйге җиңүчеләре тантанага Татарстанның төрле районнарыннан килгән иде. Һәр бәйгенең унар җиңүчесе егермешәр мең сум премиягә ия булды.

Бәйрәм җыр-моң белән үрелеп барды. Зәлия Зиннурова “Лайк” дигән өр-яңа җырын башкарды. Әтисе Зөлфәт Зиннуров та музыкаль күчтәнәч белән килгән. Рус егете Андрей Кошкин башына түбәтәй киеп саксофонда “Әпипә”, “Туган як” һәм башка популяр татар җырларыннан попурри башкарды. Айсылу Габдинова үзенең көчле тавышы белән “Тантана” залын яңгыратты.

Бәйгенең символы – җиңүченең исеме язылган истәлекле телефонтоткыч. Җиңүчеләргә аны диплом һәм чәчәк белән бергә Татарстан Республикасы Дәүләт Советының Мәгариф, мәдәният, фән һәм милли мәсьәләләр комитеты рәисе Айрат Ринат улы Зарипов тапшырды. Исегезгә төшерәбез, «Блогер.Татар» бәйгесен Татарстан Республикасы Президенты каршындагы Татар телен саклау һәм үстерү мәсьәләләре комиссиясе ярдәме белән «Матбугат.ру» порталы оештырды. Комиссия рәисе Марат Готыф улы Әхмәтов кинәт килеп чыккан эшлекле сәбәпләр аркасында, кызганыч, бәйрәм тантанасында катнаша алмады. Аның каравы, Беренче «Блогер.Татар» бәйгесе җиңүчеләрен бүләкләү тантанасында ул мөхтәрәм кунак булган иде. Тантананың шушындый форматта узуы буенча үзенең җылы хисләрен белдергән иде шулчак.

Бу юлы үткәрелгән бәйгедә җиңүчеләр арасында Төркиядән Алсу Нургатина һәм Бишкек каласыннан Нурия Шәрәфетдинова да бар иде. Нурия ханым ерак Кыргызстаннан бәйрәм тантанасында катнашучыларга видеосәламен яздырып җибәргән.

Диплом һәм акчалата бүләк алучылар арасында танылган медиашәхесләр дә бар. Гөлүсә Батталова, Эльмира Сираҗи, Айваз Садыйров һ.б. Айваз үз бүләген алганда сүзсез калмады, рәхмәтләрен әйткәннән соң 20 мең сум бүләген ничек сарыф иткәнен дә сөйләде. Өенә микродулкынлы мич алган икән. “Бик кыйммәт булган ул”, – дигән төрттерүгә “встраиваемый ул, шуңа кыйммәт”, – диде җиңүче. Шулай ук Айваз бәйрәм тантанасының 5 минутын “урлап”, “Татар блогерлары кодексын” тәкъдим итте. Аны экранга чыгарып һәр 6 пунктын тәфсилләп аңлатты. Файдалы тәкъдим булды бу. Һәм аның «Блогер.Татар» бәйгесендә яңгыравы бик урынлы һәм символик булды.

20 мең сум бүләкне ничек файдаланачагы турында Айгөл Тимер дә серен чиште. Ул бу акчаны үзенең блогын үстерергә тотачак. “Мин әле бу бүләктән тыш иремнән “спор” да оттым, чөнки ул минем җиңәчәгемә ышанмады, карале син аны!” – ди Айгөл Тимер.

Әбисенә “Нәнәй” аккаунтын алып барырга ярдәм итүче Альбина Исмаева 20 мең сум акчаны әбисенә алып кайтып, кулына тоттырган. 86 яшьлек Фәния әби оештыручыларга күз яшьләре аша рәхмәт әйтә. Түбән Камада яшәп ятучы Ак әбине бүген 8 мең кеше укый. «Блогер.Татар» бәйгесендә җиңгәннән соң укучылары саны тагын да арткан.

Җиңүчеләрне бүләкләү тантанасының рәсми өлеше тәмамлангач, кечкенә генә чәй эчү мәҗлесе булды. Аралашу, танышу, селфи-мелфи һ.б. Ә без, оештыручылар, телефоныбызга һәм инстаграмнарыбызга кич буе рәхмәт сүзләре кабул иттек.