“Фәлән-төгән” спектакле Буада

Әлмәт драма театры 4, 5, 6 декабрь көннәрендә Александр Чернобровкинның “Фәлән-төгән” комедиясен Буа районында күрсәтәчәк. Әлеге әсәр урыс теленнән тәрҗемә, шулай да биредә милләтләрнең әһәмияте юк. Комедия безнең тормышыбызның бик йогышлы һәм хроник авыруы -корррупция хакында.

Бакча участогын бораулатканда су урынына ялгыш җир астындагы үткәргеч тишелеп җыелган кара алтын ятмасына тап булган хуҗалар: Камил һәм хатыны Зөһрә “күктән төшкән мөмкинлектән төрлечә файдаланып карый: элек тавышсыз-тынсыз гына урлап акча эшли, “погонлы убыр” ияләшкәч, бизнесын рәсимләштереп котылмакчы була. Әмма беркетмә төзергә әзер сәбәп белән килгән әрәмтамаклардан арына алмыйлар. Экология иминлеге, санэпидемстанция, янгын куркынычсызлыгы хезмәте, “түбә” вәгъдә иткән бандитлар әҗер-бүләккә өмет белән бер-бер артлы бусага таптый.

Язучылар берлегенә кермәвен “көтүдә йөрмим, өер турында әйтеп тә торасы юк” дип аңлаткан авторның нәфесле түрәләрне каты чеметүенә гаҗәпләнәсе юк. Александ Чернобровкинның сату тыелган китаплары да шактый икән. Бу пьесасын, мисал өчен, Башкортостанда куярга рөхсәт итмәгәннәр, ди.

Ә “Фалян-туган” - урыс авторының пьесасына куйган исем һәм әсәрдәге төп герой Камилнең (Камил исеме дә Чернобровкинны) ике сүзнең берендә әйтергә ярата торган “тәмле сүзе” ул.

1

2

3