Татар әдәбияты тарихы музеенда Кави Нәҗми һәм аның хатыны турында күргәзмә ачыла

15 декабрьдә Татар китабы йортында (Шәриф Камалның мемориаль фатиры булган татар әдәбияты тарихы музее) «Аларның сүнмәс уты...» дип исемләнгән күргәзмә ачыла. Күргәзмә язучы Кави Нәҗминең 120 еллыгына һәм аның тормыш иптәше-тәрҗемәче Сәрвәр Әдһәмовага багышлана.

Музей хезмәткәрләре аны гадәти булмаган форматта әзерлиләр: тамашачыларны Кариев театры актерлары һәм музыкантлар катнашында перфоманс көтә.

Шәриф Камал һәм Кави Нәҗми яхшы мөнәсәбәтләрдә булалар. Кави Нәҗми кулга алынгач, Шәриф Камал аны яклап чыгыш ясаган, дуслыкларына тугры калган. Хәзер Татар китабы йортында К. Нәҗми һәм Әдһәмованың китапханәсе саклана. Күргәзмәдә Кави Нәҗминең документлары, фотосурәтләре, күпсанлы хатлары тәкъдим ителәчәк.

Күргәзмә ачылганнан соң, «Совет чорыннан соң вакытта мемориаль мәдәният: Кави-Сәрвәр, яки йөзләр аша тарих» дигән панель дискуссия узачак. Аның темасы – Кави Нәҗми һәм Сәрвәр Әдһәмова иҗатының актуальлеге, аларның әдәби процесска йогынтысы; аларның кешеләр өчен үрнәк булырлык язмышлары, хәзерге Россиядә мемориаль мәдәниятне аңлау омтылышы.

Күргәзмә кысаларында «Мәңгелек хатлар: Кави Нәҗми һәм Сәрвәр Әдһәмова хатлары нигезендә чорның мәдәни йөзен һәм үзара мөнәсәбәтләрне торгызу» дигән лекторий планлаштырылган.

Нәҗми-Әдһәмованың пары – ХХ гасыр башында Казан әдәбиятында һәм мәдәни тормышында күренекле шәхесләр.

Аларның драматик вакыйгалар тулы тормыш тарихы – әдәби тормыш белән идарә итүче совет институтлары барлыкка килгән, татар әдәбиятының яңа үсеш коллары билгеләнгән, иҗади кешеләрне эзәрлекләү, шул ук вакытта тыелган исемнәрнең намусын торгызу эшләре барган катлаулы чорның иллюстрациясе.

Ачылу тантанасы 14.00 сәгатьтә башлана. Күргәзмәгә 25 декабрьгә кадәр музей билетлары буенча кереп була.