Айгөл Әхмәтгалиева: "Хәзер китап кайгысымы, синең язганың кемгә кирәк, дип вакыт-вакыт канатлар салынган вакытлар да була"

Хәзерге заманның аралашу үзенчәлекләре, социаль челтәрләрдәге тормыш, тәрбия, мәктәп һәм гаилә проблемаларын автор бик үзенчәлекле итеп тасвирлый. Әсәр беренче тапкыр “Мәйдан” журналында басыла. 

 

Яңа китапны тәкъдим итү чарасына Татарстан Язучылар берлегеннән Илсөяр Иксанова да килгән иде. Ул язучы-драматург Айгөл Әхмәтгалиеваның әдәбиятта үзгә урыны барлыгын билгеләп кенә калмыйча, аның иҗат портретын баетып, әсәрләренә анализ да ясады. 

– Язучылар берлегендә 200дән артык хатын-кыз язучы бар. Актив иҗат итүчеләр арасында үз стиле, үз кыйбласы булган, бөтен язган әсәрләре белән аерылып торган Айгөл Әхмәтгалиеваны билгеләп үтәсе килә. Дөнья мәшәкатьләреннән аерылып зур проза әсәрләре язу өчен батырлык та кирәк. Аның “Туташ” кебек тарихи романнар язырга алынуы да сокландыра, – диде ул. 

 

Айгөл ханымның әдәбият өлкәсендәге уңышларын шагыйрә Асия Юнысова да билгеләп үтте.

– Хатын-кыз язучыларга хас психология дә, сизгерлек тә бар аңарда.  Тел тоемы да, теманы тотып ала белү дә бар аңарда. Гаҗәеп тыйнаклык та бар. Ул шул тыйнаклыгын әсәрләренә алып килә, – диде шагыйрә Асия Юнысова язучының “Казан утлары”нда басылган соңгы әсәренә дә тирән анализ биреп. Сүз уңаеннан, журналның 12 санында Асия апа Юнысованың да бик яхшы повесты бар.

 

– Үземне бәхетле кеше дип саныйм. Гомер буе яхшы кешеләр  генә очрады. Кайда эшләсәм, кайда укысам да, миңа теләктәш була алган, һәрвакыт канат куеп торучы, уңышларыма сөенә белүче хезмәттәшләремә рәхмәт, – диде Айгөл Әхмәтгалиева очрашуга йомгак ясап. – Бер рәхмәт мең бәладән коткара. Рәхмәтлемен язмышка да, юлымда очраган кешеләргә дә. Китап чыгару идеясе белән “Казан утлар”ы үзләре чыкты. Барлык мәшәкатьләрне үз өсләренә алдылар. Яшерен-батырын түгел, хәзер китап кайгысымы, синең язганың кемгә кирәк, дип вакыт-вакыт канатлар салынган вакытлар да була. Шушындый очрашуларга баргач, укучыларның таушалып беткән китап күрсәтүләре, укыйбыз дип әйтүләре һәм яңа әсәрегез кайчан булыр икән дип сораулары илһамландырып яшәүгә көч биреп җибәрә дә, канатланып тагын язарга тотынасың. Язмышлар һәркайсыбыз сынап тора, кем чир белән, кемне нәрсә белән. Нинди генә сынау кемгә генә килмәсен, таяну ноктабыз булса иде. Аллаһы Тәгалә биргән кануннармы ул, матурлыкка тарткан китапмы, яныбызда таяныч булган кешеләрме  – шул таяныч ноктабыз булсын. 

 

Яңа китап белән очрашу кичәсендә Балтач районы  Норма районы китапханәчеләре дә килгән иде. Алар укучыларга иң элек Айгөл Әхмәтгалиева китаплары белән танышуларын һәм барысын укып баруларын әйтеп үттеләр.