08.10.2021 Дин

Ятим малын ашаган дип саналамы?

"Күршебез биш ятимне тәрбиягә алды. Бөтен авыл моны акча өчен эшләгән дип уйлый. Ләкин дин буенча, ятимнәрнең малын ашау зур гөнаһ санала. Күршебез ятим балалар акчасына алган ризыкларны ашый, әлеге акчаны кирәк-яракка тота. Бу очракта ул ятим өлешенә кергән буламы?" - дип сорый лаештан Сәвия.

“Гаилә” мәчете имам-хатыйбы Рөстәм хәзрәт ХӘЙРУЛЛИН:

— Ятимнәрнең малы турында Аллаһы Тәгалә Коръәндә җитди әйтә. Ятим малына керергә ярамый. Ул аныкы. Ятимнәрне тәрбиягә алган өчен дәүләттән акча бирелә. Ул акчага гаилә өчен уртак кирәк-ярак, азык-төлек аласың икән, бу ятим өлешенә кергәнне аңлатмый. Әлбәттә, максатың баланы тәрбиягә алып акча эшләү, ятимнән күчкән мөлкәтне уңга-сулга туздыру булса, бу очракта гөнаһлы гамәл кыласың. Әмма ниятең изге икән, бер кәстрүлдән ашарга, ятим акчасына алынган ризыкны уртакка пешерергә рөхсәт ителә.

Ислам динендә ятимнәрнең хакы бик зур. Әгәр гаиләдә әти кеше вафат икән, әнисе исән булса да, бала ятим санала. Мондый вакытта кайбер авылларда авыр кайгы кичергән гаиләне чакырып, өч көн кунак итү гадәте бар. Ятимне ашату, авыр чакта ярдәм итү — саваплы гамәл. Ятимнең малын тартып алган өчен Аллаһ җәзасын бирергә мөмкин.

---
Ирек мәйданы
№ --- | 08.10.2021

Фикерләр

Илшат

№1 (911157) / 08.10.2021 23:24:51

Белорет районында Сәрмән дигән авылда детдом була иде зур гына.
Балаларны патронажга бирәләр, моның өчен 18 мең сум акча да түлиләр турында фәрман чыккач, андагы балаларны бер атна дитгәндә бүлешеп алып беттеләр. Блат буенча алды күбе, танышлык, кода-кодалык буенча. Сугышып беттеләр балаларны алу өчен. Ул чакларда авылларда хәзмәт хакы түләү юк, сыер хакы 10 мең була иде иң күп дигәндә.
Бар халык аптырады Мәскәү түрәләренең томаналыгына. Эшләгән кешегә акча юк, патронатка ай саен сыер ярымлык акча. Балаларны апкайткач, авыл халкы аларны мал каратып, утын, печән әзерләтеп, көн саен 12шәр сәгат эшләтеп тагын 10шар меңлек табыш алып ятты бит әле.
Мондый тинтәк, мокыт түрәләр бездә генәдер инде ул.