04.10.2021 Дин

Гошер сәдакасы кемнәргә бирелергә тиеш?

Көзге уңыш җыеп алынды, бакча эшләре төгәлләнеп килә. Быел җәй коры булса да, Аллага шөкер, яшелчә, җиләк-җимеш үзебезгә җитәрлек. Мөселман, гадәттә, уңыштан гошер сәдакасы түли. Аны бирү фарызмы? Уңышның күпме өлешен сәдака итеп түләргә кирәк? Гошернең савабы турында Алабуга шәһәре һәм районы имам-мөхтәсибе Хәлим хәзрәт Шәмсетдинов белән сөйләштек.

— Хәлим хәзрәт, гошер сәдакасын тапшыру фарызмы? Аның асылы нидә?

— Табигый рәвештә сугарылган, җир асты сулары, яңгыр белән үскән уңышның уннан бере, ә хезмәт куеп, су сибеп үстергән уңышның егермедән бер өлеше сәдака итеп бирелергә тиеш. Бу хакта Пәйгамбәребез Мөхәммәд (с.г.в.) хәдисендә Гомәр ибн Хәттаб (р.г.) сүзләре дә бар. Көз көне җыеп алынган уңыштан бирелгән сәдаканы гошер дип атыйлар. Ул мөселманнар өчен фарыз, ягъни тиеш гамәл санала.

— Гошер сәдакасы кемнәргә бирелергә тиеш?

— Гошер сәдакасы — зәкәтнең бер төре. Ул билгеле бер төркем кешеләргә бирелә. Бу кешеләр исемлеге Коръәндә “Тәүбә” сүрәсенең 60 нчы аятендә искә алына. Аллаһы Тәгалә әйтә: “Сәдаканы мескеннәргә, бурычлыларга, Аллаһ юлында булган кешеләргә, динне өйрәнүчеләргә һәм өйрәтүчеләргә, мосафирларга бирү фарыз ителде”. Гошер сәдакасын бер генә кешегә, күләме күбрәк булса, берничә гаиләгә бирергә мөмкин.

— Мәчетләрдә гошер сәдакасын җыябыз дигән игъланнарны күрергә туры килә. Уңышның бер өлешен мәчеткә бирергә буламы?

— Гошер мәчет өчен тапшырылмый. Мәчет — ул гошерне җыеп тарату урыны гына. Аннары аны Аллаһ юлында булган кешеләргә, мәдрәсәләргә, анда укучы шәкертләргә, укытучыларга, мескеннәргә, мәчеткә йөрүче мохтаҗларга, дини уку йортларына тараталар.

— Яшелчәне сатып, акчасын гошер сәдакасы итеп тапшырырга ярамыймы?

— Болай эшләү дөрес үк булмас. Уңыш сатканнан кергән акчаны мәчеткә сәдака итеп тапшыруның гошердән саналуы шикле. Хәдистә дә уннан бер өлеше, егермедән бер өлеше бирелә, диелә бит. Акчалата түләү турында бер сүз әйтелми.

— Сезнең мәчеттә гошер җыеламы? Күбрәк нәрсәләр китерәләр?

— Һәр елны Татарстан Диния нәзарәте тарафыннан гошер җыю көннәре аерым билгеләнә. Бу хакта халыкка игълан итәбез. Җомга намазлары вакытында гошер сәдакасының савабы турында сөйлибез. Аллага шөкер, гошер китерүчеләр елдан-ел арта. Күбрәк бәрәңге, кишер, кызыл чөгендер, суган, кабак, кыяр, алма китерәләр. Бал бирүчеләр дә бар.

— Быел җәй коры килде. Күп кеше бәрәңге начар дип зарлана. Андый вакытта гошер сәдакасы бирү мәҗбүриме?

— Нинди ел булуга карамастан, гошер сәдакасы бирелергә тиеш. Кайберәүләр, нишләп үзем тапкан малны, үз кулларым белән су сипкән, тырышып үстергән яшелчәне кешегә бирергә тиеш, дип уйлый. Ләкин шуны аңламый: мул уңыш алырга телисең икән, ихлас күңелдән гошер сәдакасын бирү кирәк. Саранланмасаң, малның бәрәкәте арта.

Фото — dumrt.ru

Эльвира МОЗАФФАРОВА
Ирек мәйданы
№ --- | 04.10.2021