Гөлназ Сәфәрова: “Хатын-кыз иренә буйсынырга тиеш”

 

— Өстемә артык күп эш тә алам бугай кайчак. Өлгерермен дип уйлыйм да, аннары барысы бергә өелә. План белән яшим. Атнам, көнем бер ай алдан планлаштырылган. Кичектергесез эшләр килеп чыкканда, дусларым ярдәм итә. Әйтик, тиз арада сәхнә күлмәкләрен юдыртып алырга кирәк икән, моны шул көнне үк эшләп бирүче танышларым бар. Әлбәттә, Аллаһы Тәгаләнең ярдәме белән бөтенесенә дә өлгерәм. Әти-әнидән, туганнарымнан башка авыр булыр иде. Аларга зур рәхмәт. Әни улыбыз Айданны тәрбияләүгә аеруча зур өлеш кертә. Ул мәктәптәге яңалыклардан да хәбәрдар. Документация эшен, килешүләрне ирем алып бара. Бу — җаваплы, җитди эш.

 

 

— Әлбәттә, әтинең бәясе минем өчен мөһим. Сценарийлар язганда, хәтта “Инстаграм”да пост куйганда да теманы әти белән киңәшләшәм. Ул мине кечкенәдән мөстәкыйль фикерләргә өйрәтте. Язма әзер булгач, баш исем табарга булыш, дип ярдәм сорап килә идем. Ә ул: “Уйла, 10 баш исем тап, берсен сайлап алырбыз”, — ди. Һәрчак таләпчән булды.

 

 

— Юбилейдан бигрәк, бу — күңел халәтем. Биш ел элек уздырырга ниятем бар иде. Тик ул чакта әзер түгел идем. Хәзер җитлектем. Күрсәтер эшләрем, тәҗрибәм, ирешкән уңышларым бар. “Татар радиосы”нда 18 ел эшлим. 28 яшемдә “Татарстанның атказанган артисты” исемен бирделәр. Бу — зур җаваплылык. Якыннарымны, туганнарымны җыясым килде. Биредә мин эстрада өлкәсенә аяк басканда янәшәмдә булган артистлар катнашачак. Һәр җыр мәгънәгә ия, сценарий белән үрелеп барачак. Чарада әти, әни, әбием белән бәйле номерлар булачак. Тамашачы өчен төрле яклап ачылырмын дип уйлыйм. 3 октябрьдә узачак шоу-программа — иҗатыма йомгак ясау түгел, өтер генә кую.

 

 

— “Мин” тапшыруының яңартылган яңа сезонын башладык. Әтинең: “Гөлназның уңыш сере — кабатланмауда, яңа әйбер уйлап чыгаруда”, — дип әйткәне бар. Бер урында таптанырга яратмыйм. Бүген идея — иң кыйммәтле нәрсә. Шөкер, Аллаһ фикерләр биреп тора. “Мин” тапшыруын дәрәҗәле, сыйфатлы итәр өчен бик тырышырга, үземнән акча кертергә дә туры килә. Үз продуктымны яхшы итеп күрсәтергә телим. Арзанлы әйберне төшермәвең яхшырак. Шуңа үземә дә акча кызганмыйм. Кыйммәтле сәхнә киемнәре алам, бизәнүне үз эшенең осталары — визажистларга гына ышанып тапшырам. Яшермим, образымны тудыру өчен шактый акча китә. Әмма сыйфат мөһим.

 

Күпләр, тапшыруга эләгер өчен ирдән аерылырга, аяныч язмышлы булырга кирәкме, ди. Юк, әлбәттә. Бары кешенең ихластан үзгәрү теләге булырга тиеш. Безгә 30 ел бер прическа белән йөрүчеләр, җитеш тормышта яшәүчеләр, үлемнән калган ханымнар да килә. Кешенең психологиясе белән эшлибез. Стилист, визажист, парикмахер хезмәтләре бушлай. Ә кием-салымны сатып алырга була. Дөрес, бу мәҗбүри түгел. Үзенә нинди кием килешкәнен аңлаган кеше аны башка кибеттән дә сатып алырга мөмкин. Тапшыруда катнашырга теләп, күпләр мөрәҗәгать итә. Артист әниләре дә бар. Берәүне дә танышлык аша сайлап алмыйм. Кешегә сөенеч бүләк итәсебез килә, геройларыбыз язмышлары аша башкаларга үрнәк күрсәтергә телибез.

 

 

— Хатын-кыз үз милләтенә, халкына хезмәт итәргә тиеш. Хатын-кыз — туган телне, гореф-гадәтләрне сак-лаучы. Аның өчен беренче чиратта гаилә, баласына тәрбия бирү. Салынган орлыкларга су сибеп торучы ул — хатын-кыз. Аның уңышка ирешкән, камилләшкән булуы да мөһим. Шул чакта гына ул канәгатьлек хисе тоячак, ирекле фикерли алачак. Моның өчен җитәкче булырга димәгән, һәр кеше үз өлкәсендә оста. Кемдер табиб, әйбәт сыер савучы, тәҗрибәле укытучы. Көнләшү һәр кешегә хас. Әмма башкалар тормышына кызыкмыйча, үзеңнекен булдыру күпкә кыйммәтрәк. Хатын-кыз иренә буйсынырга тиеш. Мин — гаиләдә бөтенләй икенче кеше. Иремнең сүзенә һәрчак колак салам. Аның фикере бик мөһим. Ул акыллы. Әтигә охшаган. Дөрес, буйсыныр өчен ирең моңа лаек булырга тиеш. Эчкече, кыйный торган, ялкау ирләргә баш иеп яшәмәвең яхшырак.

 

— Буш вакытымны тулысынча гаиләмә багышлыйм. Кайбер көннәрдә хәтта телефонымны сүндереп, бер СМС-хәбәргә җавап бирмичә, вакытымны гаиләм белән уздыра алам. Бу — минем өчен иң кадерле мизгелләр.