06.09.2021 Язмыш

“Ирем читкә йөри башлады, нишләргә дә белмим"

Инстаграмда бер хатын: “Ирем читкә йөри башлады, нишләргә дә белмим, киңәшер кешем дә юк, бу шәһәр миңа бөтенләй ят, ачылып сөйләшеп утырырга бер туганым да юк”, — дип язган иде. Чыннан да, ышанып язмышыңны бәйләгән, бердәнбер якыным дип карап торган ирең дә ятларны үз иткәч, чит җирдә кая, кемгә барасың?

Әле чит шәһәр яки район җиренә кияүгә чыккан кызларга шулай авыр, ә чит илгә китүчеләренә ничек икән? Хәзер чит ил кешеләренә кияүгә чыгучы кызлар, хатыннар шактый. Аларның барысы да рәхәттә яшидер дип уйламыйм: ни генә дисәң дә, чит чит инде ул.

Күршебезнең кодачасы Вера (исемен үзгәрттем) да күптән түгел Америка кешесенә кияүгә чыккан. Кияү бик бай, миллионер ди. Интернет аша танышып, ярты ел чамасы аралашканнан соң егет үзе монда килгән. Туй ясаганнар. Хәзер Вера океан артындагы чит-ят җирләргә китү өчен документларының әзер булуын көтә икән.

Күршебез туй фотоларын да күрсәтте. Вераны инде байтактан беләм. Бик чибәр, зифа буй-сынлы яшь хатын ул. Туй күлмәгеннән фотога тагын да матур булып төшкән.

Кияү исә Верадан күпкә олы күренә, рәвешенә картлык билгеләре чыккан, елмаюы да ыржаюны хәтерләтә. Уртача буйлы, юантык гәүдәле үзе. Мондый ирләрне һич тә кимсетеп әйтергә теләвем түгел, тик Вера андыйлар белән сөйләшеп тә тормый иде. Моңа кадәрге ике ире озын буйлылар, мускуллары уйнап торган мәһабәт гәүдәле затлар иде.

Американлының акчасы кызыктырганмы Вераны, матур тормыш эзләвеме... Һәрхәлдә, сөю-мәхәббәт түгел. “Үзе шөкатьсез булса да, холкы бик әйбәт аның”, — дип әйтеп куйды күршем, уйларымны сизенгәндәй. Ай-һай, кыска гына вакыт эчендә холкын белеп бетерделәрме икән әле?

Их, ялгышадыр кебек Вера. Ниләр көтәдер аны чит илдә, читлеккә ябылган кошчыкка әйләнмәсме? Моң-зарларын сөйләрдәй, шатлыкларын уртаклашырдай дуслар таба алыр дип ышанмыйм. Олыгая барган саен сагындырыр әле туып-үскән җирләре.

Фәридә. Казан.

---
Татарстан яшьләре
№ --- | 06.09.2021