Самараның Волгарь бистәсендә этнографик комплекс ачылачак

Билгеле булганча, ике дистә өйләрнең күпчелеге инде әзер, матурлау-бизәү, экспонатлар урнаштыру эшләрен төгәлләп киләләр. Татар өенең дә тышкы ягы чын безнеңчә итеп милли бизәкләр белән бизәлгән, яшелле-аклы төсләргә буялган. Өйнең эченә керсәң дә шушында каласы килә – сап-сары бүрәнәләрен, киң идән такталарын, мичен-сәкесен, өлкә милли-мәдәни автономиясе рәисе Әнвәр Горланов акчасына искертеп ясалган яңа өстәлен һәм урындыкларын күреп, ностальгиягә биреләсең.

 

Үткән сишәмбедә бу өйдә, ниһаять, милли оешмаларның беренче утырышы да узды. Әле киез дә җәелмәгән сәкегә тезелешеп утырган “Туган тел” җәмгыяте президенты Ильяс Шәкүров (рәсемдә сулдан уңга), Тарихи мәчет Советы рәисе Усман Илингин, мөфти Талип Яруллин, оешма активистлары Әхтәм Ногманов, Артур Хаҗиев һәм башкалар бу өйне генә түгел, йортын да ничегрәк җиһазландырырга, дигән сорауга җавап эзләделәр. Ә моның өчен өйгә хуҗа һәм хуҗабикә сайларга кирәк иде. Фикер алыша торгач, өй өчен Тарихи мәчет рәисе Усман Илингин җавап бирәчәк, дигән фикергә килделәр. Чөнки, беренчедән, Тарихи мәчет моннан ерак түгел, икенчедән, анда да татар-мөселман тарихына багышланган музей ачылырга тора. Димәк, экспонатлар белән эшләү буенча тәҗрибә дә бар инде.

 

Ә өйне карап-тикшереп, тузаннарын сөрткәләп, килгән кунакларга ишек ачып, татар өе үзенчәлекләре турында сөйләп торучы итеп шушы Волгарь бистәсендә яшәүче Әлфия ханым Хуҗанова сайланды.

 

Әлбәттә, татар өенең күрке – тәрәзә пәрдәләре, чаршаулар һәм ястыклар, суккан паласлар һәм чиккән сөлгеләр. Болар өчен дә җаваплы кеше табылган – “Алтын инә” ательесы хуҗабикәсе Гөлнара Насыйрованың алтын кулларыннан башка чыгыша алмабыз. Тик менә кемнәрнең өйләрендә борынгы савыт-саба, сирәк шамаил кебек әйберләр булса, “Бердәмлек” редакциясенә шалтыратып әйтә, яисә китереп бирә аласыз. Ә андыйлар бар: мәсәлән, Иске Ярмәктән Гөлисә Бәдретдинова – бишек, тарихчы Шамил Галимов – гармун, комган, керогаз, ипи калае, гөбе кебек әйберләр китереп бирделәр. Әле тагын корама юрган, чиккән мендәр-ястыклар, борынгы чуеннар, балчыктан эшләнгән чүлмәкләр кирәк. Артык булмасмы дип шикләнмәгез, кирәге калмаса, кайтарып бирербез.

 

Ә йорт кирәк-яраклары белән Тупли авылында яшәүче Әхтәм ага Ногманов тәэмин итәргә алынды. Ул озак еллар буе шундый борынгы әйберләрне җыеп барган һәм инде хәзер аларны Татар йортына тапшырырга ниятли.

 

Менә шулай, бөтен өлкә татарлары ярдәме белән, татар өен 12 сентябрьгә кадәр җиһазлап бетерергә тиешбез. Ярдәм көтәбез!