|
|
Бүген кемнәр туган
|
|
Архив
|
03.11.2010 Җәмгыять
Түрәләр “авыруы”Дәүләт оешмаларына кирәк-яраклар сатып алуга бирелгән акчаның биштән бере түрәләр кесәсендә утырып кала. Ил Президенты Дмитрий Медведев моңа чик куймакчы. Ул “йонлы куллы” түрәләрне төрмәгә утыртырга кушкан. Җинаятьләр кодексына өстәмә әзерли башлаганнар инде. Бүген дәүләт оешмаларына кирәк-яраклар сатып алуга биш триллион сум чамасы бюджет акчасы сарыф ителә. Бу хакта Президентның күзәтү идарәсе җитәкчесе Константин Чуйченко әйткән. Аның сүзләренә караганда, әлеге сумманың 1 триллионы сатып алучы һәм сәүдәгәр арасында “юкка чыга”. Президентны әнә шул чыгарыннан чыгарган, күрәсең. Ул кыңгыр юл белән акча эшләүче түрәләргә каршы кискен чара күрергә кушкан. “Сәүдә мәйданында акча үзләштерүче түрәләрне ачыкларга һәм төрмәгә утыртырга кирәк”, – дигән Дмитрий Медведев. Аның фикеренчә, башка чара юк.
Дәүләт оешмаларына кирәк-яраклар сатып алганда бюджет акчаларының “югалуына” бәйле очраклар моңарчы да мәгълүм иде. Хәтерләсәгез, быелның җәй аенда кайбер оешмаларның медицина томографларын җитештерүче бәясеннән өч тапкыр кыйммәтрәк сатып алуы ачыкланды. Әлеге медицина җиһазы 16 миллион сум тәшкил итсә, Самара һәм Курск өлкәләре түрәләре аны 50 миллион сумга сатып алган. Ростовта исә халык сәламәтлеген кайгыртучы җитәкчеләр бер томограф өчен 90 миллион сум акча чыгарып биргән.
Президент тәкъдимен Дәүләт Думасының комитет рәисе Павел Крашенинников та хуплаган. “Мин бөтен кешене дә төрмәгә утыртып бетерү яклы түгел, әмма кылган җинаять өчен җәза булырга тиеш”, – дигән ул. Крашенинников “йонлы куллы” түрәләрне зур күләмдәге штрафлар белән камчыларга киңәш иткән. Кайбер белгечләр исә Медведев тәкъдимен күз буяу дип кенә атаган. “Бөтен организм авыру булганда, үпкәне дәвалаудан ни файда?” – дигән алар.
|
Иң күп укылган
|