"Туган авылым аккаунтын күптән булдырасым килеп йөри идем, кул җитмәде, "Блогер.Татар" бәйгесе яхшы форсат тудырды"

Исегезгә төшерәбез: Икенче «Блогер.Татар» бәйгесе авылларга багышлана - 10 җиңүче 20шәр мең сум отачак. Туган авылларын бар дөньяга танытып, акчалата бүләк отасы килүче блогерлардан 31 августка кадәр кызыклы, үзенчәлекле эшләр кабул итәбез.

Бер шатлыклы хәбәребез бар. Укучыларыбызның берсе нәкъ менә безнең бәйге турында ишетеп үзенең авылының аккаунтын булдырган. "Туган авылым аккаунтын күптән булдырасым килеп йөри идем, кул җитмәде, "Блогер.Татар" бәйгесе яхшы форсат тудырды", - ди Илмира Муфтахова. Хәзер ул Азнакай районы Урманай авылына багышланган төркем алып бара. 

Хәзерге вакытта Илмира гаиләсе белән Әлмәттә яши икән.

- Туган авылымның төркемен "җанлы" итеп күрәсем килә: ниндидер рәсми белдерү, игъланнарга гына кайтарып калмыйча, саф татарча матур итеп язылган яңалыклар, язмалар, үзем язган шигырьләр урнаштырып барырга тырышам. Фото-видеолар аша авылыбызның матурлыгын күрсәтәсем килә. Читтә яшәгән авылдашларыбыз да сагынып карарлык булсын, - ди ул. 

Илмира Муфтахова һөнәре буенча укытучы-филолог, психолог. Ләкин блогерлык өлкәсе дә аңа чит түгел, иҗади бәйгеләрдә һәрвакыт бик теләп катнашуы турында сөйләде ул "Матбугат.ру" хәбәрчесенә. Әти-әнисе, ире бу эшен хуплап, ике кечкенә улы да илһамландырып, зур көч биреп торуын яшерми. Авылдашларының рәхмәт сүзләре дә алга таба эшләргә рухландырып тора икән.

Бәйгедә катнашучыларга теләкләрен дә әйтте Илмира: 

- Сан өчен түгел, сыйфат өчен эшлик. Саф татар телендә, матур эчтәлекле аккаунтлар санын арттырсак, моның нәтиҗәсе дә булачак. Язылучылар да күрәчәк. Барыбызга да уңышлар телим!

"Блогер.Татар" бәйгесендә катнашу уңаеннан Илмираны инде "ТНВ" каналының "Таяну ноктасы" тапшыруына да чакырганнар. 4 август көнне күрсәтәчәкләр. 

Исегезгә төшерәбез: "Блогер.Татар" бәйгесен Татарстан Президенты каршындагы Татар телен саклау һәм үстерү мәсьәләләре комиссиясе ярдәме белән "Матбугат.ру" порталы оештыра. Анда авыл аккаунтлары гына түгел, теләсә кем җиңә ала. Үз аккаунтыңа туган авылың турында пост эләсең дә, шул 1 пост белән җиңү яуларга мөмкинсең. 5 җиңүче авыл аккаунтлары арасыннан билгеләнәчәк, ә 5 җиңүче - авыл турындагы постлар арасыннан. 10 җиңүченең һәркайсына 20 мең сум күләмендә акчалата премия тапшырылачак.

Катнашыгыз! Һәркайсыгыз катнашыгыз. Бәйгенең бөтен шартлары Bloger.tatar сайтында.

12+