Машинадамы, җәяүме?

31 октябрь – Автомобильчеләр көне иде. Руль артында йөрүчеләр саны көн саен арта. Тимер аттан башка яшәүне күз алдына да китереп булмый бүген. Ә сезнең тормышта машина нинди роль уйный?

Рәшит ШАМКАЙ, юмор остасы:

– “Эфир” каналыннан “Перехват” тапшыруын карагач, урамда юл һәлакәтенә очраган кешеләрне күреп: “Ярый әле машинам юк”, – дим. Гел юлда йөрибез. Коточкыч фаҗигаләргә юлыгучыларны күргәч, бик куркыныч булып китә. Зур-зур “КамАЗ”лар авып ята. Алла сакласын һәммәбезне. Кайберәүләр артыгын кылана, тизлекне 130 дан арттыра. Шаярырга ярамый. Техника үзенә сак караганны ярата.

Машина гел проблема гына тудыра ул. Йорт янында да йөрер урын калмады. Мин җәяү йөрергә яратам. Күбрәк өйдә утырам. Гастрольләргә барасы булса, килеп алалар, китереп куялар. Бу яктан җайлы.

Җәүдәт ХАЛИТОВ, төзүче:

– 32 ел район үзәгендә төзелештә прораб вазыйфасын башкардым. Анда гел шофер белән йөрдем. Хәзер 12 ел дәвамында үз авылыбызда төзүче булып эшлим. Машинам юк. “УАЗ” бар иде, аны саттым. Автомобильләр белән кызыксынмыйм, элек тә шундый идем. Эш урыны өебездән 2 км ераклыкта урнашкан. Көн саен ике тапкыр барам, ике тапкыр кайтам. Якынча 8 км араны җәяү үтәм. Аның каравы зарланмыйм. Саф һавада җәяү йөрү сәламәтлек өчен дә файдалы. Иң мөһиме шул.

Берәр җиргә барасы булса, проблема юк. Улларымда җиңел машина бар, алар илтеп куя.

Венера ГАНИЕВА, җырчы:

– Гел җәмәгать транспортында йөрим. Бик җайлы. Машина түгел, аны йөртү таныклыгым да юк. Чит илдә 80 яшьлек әбиләр дә руль артында йөри, әмма мин яшем узгандыр инде дип саныйм. Ара артык ерак булмаса, җәяү баруга өстенлек бирәм. Бу сәламәтлек өчен файдалы, бераз артык авырлыкны ташларга да ярдәм итә.

Шәһәрдә машинадан күп нәрсә юк. Әгәр якын киләчәктә кешеләргә оча торган берәр техника булдырмасалар, автомобиль белән дә, җәяү дә йөрү мөмкин булмаячак. Пассажирларны җир астыннан түгел, күктән йөртер өчен берәр чара уйлап тапсалар гына ситуацияне уңай хәл итеп була. Башка чара юк. “Бөке”ләр буенча икенче Мәскәүгә әйләнеп барабыз.

Ләйлә ДӘҮЛӘТОВА, “Адәм белән Һава” тапшыруының алып баручысы:

– 3 елдан артык руль артында йөрим. Хәзер үземне машина эчендә туган кебек хис итәм. Аңа хәтле автобуста, трамвайда йөри идем, шуннан үземнең тимер атка күчкәч, аермасын әйтеп бетерү мөмкин түгел. Ул тормышымда иң зур рольләрнең берсен уйный. Өстәвенә автомат коробкалы. Бик рәхәт.

Машинасыз көнемне түгел, сәгатемне дә күзалдына китерә алмыйм. Ул бөтен проблемамны хәл итәргә булыша. Һәр минусның уңай ягы бар дигәндәй, “бөке”ләрдә дә буш тормыйм. Кирәк урынга шалтыратып алам, укыйм, берәр шигырь язып куйган чакларым да бар. Иң мөһиме – вакытны әрәм итмәү. Ходай машинадан аера күрмәсен иде, дип телим. Моңа хәтле ничек йөргәнбез?!

Булат ИДРИСОВ, таксист:

– Машина өчен үлеп торам. Кечкенәдән техниканы яраттым. Бөтен нечкәлекләрен беләм. Өстәвенә таксист вазыйфасын башкаргач, ул минем өчен керем кертүче чыганак та.

Алдагы машинамны саткач, бер ай буе җәяү һәм җәмәгать транспортында йөрергә туры килде. Бик читен. Дусларым да машинасыз бер ае буе йөрүне бер ел хатынсыз яшәүгә тиңли. Алар белән килешәм.

Фирзәр МОРТАЗИН, җырчы, композитор:

– Тормышымда беренче урында гаилә, икенче баскычта туганнар белән дуслар булса, өченчесен машина алып тора. Ансыз бер көн дә яши алмыйм. Әле бүген генә машинаны саттым. Яңасы биш көннән соң булачак. Тимер атның паспорты әзер булганны көтәм. “Форд-фокус”ның яңа моделена заказ бирдем. Шушы биш көнне ничек үткәрергә дип аптырап утырам.

30 ел инде руль артында йөрим. Үз гомеремдә, авыр йөк машиналарын да санап, 30 лап тимер ат алыштырдым. Елга 3 әрне алып саткан вакытлар да булды.

Без сәнгать кешеләре булгач, машинасыз эш бармый. Бөтен нәрсә шуңа килеп терәлә.