Сөмбел Гаффарова: "Урын алып куеп кабер мине түгел, мин каберне көтәрмен түгелме?"

Язучы Әхәт Гаффарның кызы, драматург Сөмбел Гаффарова инстаграм битендә үзенчәлекле пост урнаштырган. Аның күпләр өчен актуаль булган фәлсәфи уйларын түкми-чәчми "Матбугат.ру" укучыларына да тәкъдим итәргә булдык (үзгәртмичә бирәбез):

“Ни… Гөлназ белән Рамил үзләренә зиратта урын алып куйганнар икән бит”, - бер дустым бу яңалык белән башыма сукты диярсең. Шаккаттыммы, көтелмәгәнлектән булдымы, куркып куйдыммы шунда… организм реакциясе шундый булды – мин рәхәтләнеп көлдем.

Туганың янындагы буш урынны, үзеңә дип калдырып, чардуган корып кую безнең авылда гына түгел, башка зиратларда да бар икәненнән хәбәрдәрмен. Алдан алып куючылар сирәк түгел, дип әйтергә телим.

Авылыбыздагы әбиләр мондый хәлгә ничек караганлыклары турында, үзләренең сөйләгәннәреннән беләм, хәтерлим. Берсе әйтә, үзеңә зиратта урын алып кую дөрес түгел. Имеш, алып куелган кабер үзенә тартып тора, гомереңне кыскартасың. Икенче бер әби ун еллап элек китеп барган бабае янында урын алып куйган, әнә, төчкерми дә. Колак кырыем белән ишетеп алдым сөйләшкәннәрен – кемне алма, үлемтеккә дигән әйберләре әллә кайчан әзер. Алары тартып тормый. Алар кирәкле нәрсә.