«Әнисен җирләгәннәр, ә ул бу хакта белми әле»

27 июньдә Башкортстанның Туймазы районында җитди юл-транспорт һәлакәте булган. Зур тизлектә килүче УАЗ «Патриот» машинасы юл аша узучы 32 яшьлек хатын-кызны һәм аның 11 яшьлек улын бәрдереп китә. Бәрдерү шуның кадәр көчле була ки, алган җәрәхәтләрдән яшь хатын урында ук үлә, төрле дәрәҗәдәге тән җәрәхәтләре алган улын хастаханәгә алып китәләр.

 

— Альмир хәзер хастаханәдә авыр хәлдә. Бала бөтенләй кәефсез. Аның аягы ачык сынган, ул хәзер тарттырылып куелган, умрау сөяге сынган, шулай ук умыртка сөяге зарарланган. Табиблар аягына операция ясаячак, аннары умыртка сөягенә МРТ уздырачаклар. Аның янында әтисе тора. Әнисенең үлгәнен белми әле Альмир. Бәрелгәннән соң ул очып киткән, аннары кюветта яткан, - дип сөйләгән зыян күрүче малайның әбисе Алисә Камаева.

 

Хәзер бала Туймазы хастаханәсендә, шуңа күрә аның янына туганнары Бәләбәйдән кадәр барып йөри. Алга таба баланы озак тернәкләндерү көтә, әмма табиблар барысы да уңышлы тәмамланыр дип өметләнә.

 

Малайның әнисе, 32 яшьлек Динара Камаева 28 июньдә җирләгәннәр. Хатын-кыз белән хушлашырга аның дуслары һәм хезмәттәшләре килгән. Күпләр һәлак булучыны бары яхшы яктан гына үз эшенә бирелгән бик яхшы белгеч буларак искә ала. (Динара берничә ел инде Бәләбәй бала тудыру йортында акушер булып эшләгән, ә пандемия игълан ителгәч, "кызыл" зонага шәфкать туташы булып күчкән, анда дистәләгән кеше гомерен коткарган - "Комсомольская правда" редакциясе искәрмәсе)

 

Фаҗига буласы көнне Динара һәм Салават Камаевлар уллары белән бергә, су коенырга һәм ял итәргә дип Караидел күленә килә. Машиналарын гаилә трасса белән янәшә калдыра, ә кичен, өйгә кайтыр алдыннан, Динара белән улы әйберләрен машинага илтү өчен юл аша чыга. Шул вакытта аларны зур тизлектә килүче машина бәрдереп китә. Шаһитләр автомобильнең гаять зур тизлектә баруын һәм хәтта туктарга яки бәрдерүдән качарга тырышып та карамавы турында сөйләгән. Хәзер хокук сакчылары авария факты буенча тикшерү уздыра.

 

Һәлак булган хатынның туганнары әйтүенчә, әлеге фаҗига булыр алдыннан Динара бер кешене коткарган.

- Күлгә барганда, алар каршына машина килеп туктаган да, аннан бер кеше егылып төшкән. Аңарда эпилепсия өянәге башланган икән, тыны кысыла. Динара югалып калмый, аңа ярдәм иткән, шуның белән әлеге кешенең гомерен саклап кала алган. Ә менә үзенең генә гомере өзелде, -дип көрсенә аның каенанасы.

 

Хәзер мәрхүмәнең туганнарына баланы дәвалау һәм тернәкләндерү өчен ярдәм кирәк. Дистәләрчә чакрым ераклыктагы хастаханәгә барып йөрү шактый чыгымлы. Әгәр дә сез зыян күрүчегә ярдәм итәргә телисез икән, үзегездән дә өлеш кертә аласыз (Альмирның әбисе Алиса Муллануровна К.ның банк картасы 8(927)9201791 телефон номерына беркетелгән).