Марат Әхмәтов: «Бер-бер хәл» сериалындагы мәсьәлә меңләгән татар гаиләсендә бар»

Татарстан Дәүләт Советы Рәисе урынбасары, Татарстан Президенты каршындагы Татар телен саклау һәм үстерү мәсьәләләре комиссиясе рәисе Марат Әхмәтов ТНВ каналында күрсәтеләчәк «Бер-бер хәл» сериалында бер гаиләдә булган төрле милләт арасындагы проблеманың меңләгән татар гаиләсендә барлыгын әйтте.

«Дәүләт Советындагы хезмәткәрләр телебезгә рухи ихтыяҗны булдыруны, аның матурлыгын, әдәби нәфислеген халкыбызга сеңдерү турында уйланабыз. Яңа төшерелә торган сериалның эчтәлегенә салынган проблемалар меңләгән татар гаиләсендә бар. Сериал бу проблеманы хәл итүнең бер үрнәге булып, күп тамашачыларга үз язмышларын табарга булышыр дип уйлыйм», — дигән ул "Татар-Информ" МА.

Марат Әхмәтов өлкән буын белән яшь буын арасындагы мөнәсәбәтләрне мәңгелек проблема дип атады. «Сериалда күрсәтелгән күренешләр буенча бу мәсьәләдә ни рәвешле алтын урталыкта торуны билгеләп була, дигән сорауга җавап та табыла. Миңа калса, сериал кызыклы, эчтәлекле булыр», — дип саный ул.