«Яулык җыйганны күреп йөрәк әрни»

Лилия Купаева, Әлмәт районының Бишмунча авылы:

– Быел, беренче тапкыр, авылыбызда Сабан туе уздырылмый. Әлегә дә баягы “акча юк”. Узган ел пандемия сәбәпле булмый калган иде. Быел менә тагын шушы хәл. Аннан алдагы елларда Фирдүс Тямаев ел саен диярлек килде. Хуҗалык рәисе Фаяз абый ничек итсә итә, тырыша, спонсорларны таба иде. Үзе дә саллы өлеш кертә иде. Ләкин гел бер кешегә генә димәгән бит инде. мәдәниятне болай да ул кайгырта, бәйрәмнәребез чыгымнарын да үз өстенә ала. Якын-тирә авылларга, шәһәрләргә чыгар өчен транспортын да бирә. Үз хезмәтчәннәрен хөрмәтләп Сабан туен уздырды. Афәрин диябез, гаепләмибез. Ә менә авыл җирлеге башлыгына бернинди дә мәшәкать кирәкми шикелле. Халыкның елга бер тапкыр күрешеп-очрашып яшьлекләрен искә төшереп аралаша торган, көне буена сузыла торган сагынылган бәйрәме бит инде ул Сабантуе. Эххх.. Текә артистлар күңелле инде ул, юк икән – үзебездә дә акчага җырламый торган яхшы җырчылар, оста башкаручылар бар. Истаграмны ачкан саен яулык җыйган күренешләрен күреп йөрәк әрни. Капка төбеннән ары уза алмый торган өлкән яшьтәгеләргә чып-чын бәйрәм ясап китә торган идек. Безнең районның Сөләй, Яңа – Кәшер авылларында да Сабан туйлары узмый дип ишеттек. Мондый бәйрәмнәр авыл халкын берләштерә. Болай булгач, бердәмлек тә китәр микән инде?

 

Рамил Шәрәров, юмор остасы:

– Үзем дә авылыбызда Сабантуй үткәрер идем, бәлки. Ләкин Буа районының Адав-Толымбай авылында Сабантуй үткәрү өчен мөмкинчелек юк. Алдагы елларда күлнең икенче ягында уздырыла иде бәйрәм. Хәзер аны чыгарга басма да юк. Сабантуй мәйданын тәртипкә китерергә дә шактый вакыт һәм чыгым кирәктер, дип уйлыйм. Авылыбызда Сабантуй соңгы тапкыр 2014 елда уздырылган иде. Үзем, булдыра алганча, туган ягым, авыл халкының күңелен күрергә тырышам. Быел концерт кайтып куйдым. Киләчәктә Сабантуйлар да булыр дип ышанып калам. Ләкин Буаның Сабантуй буласы мәйданы авылыбыздан 3 чакрым ераклыкта гына урнашкан. Авыл халкы бернинди авырлыксыз шунда да бара ала. Шуңа күрә авыл халкы бәйрәмнән мәхрүм каладыр дип уйламыйм.

 

Гөлназ, Биектау районының Юртыш авылы:

– Бездә Сабан туе була, тик халык үзе акча җыйды. Районнан акча бирүче булмады.

 

Гөлгенә Хәйбуллина, Азнакай районының Урманай авылы:

– Быел ике авылның Сабантуе бергә уздырыла. Күрше авыл халкы Урманайга төшәчәк. Алар, бәлки канәгать тә түгелдер, ләкин машиналары булмаган кешеләргә транспорт тәкъдим ителә. Игътибар да аз булмас дип уйлыйм. Нишлисең инде, хәзер заманасы шундый. Элек совхозлар бар чагында, җитәкчеләр Сабантуй үткәрергә ярдәм итә иде. Күпмедер күләмдә акча бүленеп бирелә, һәм шуңа бүләкләр алына иде. Заманалар үзгәрде. Элекке совхозлар юк. Инвесторга безнең Сабантуйлары кирәк түгел. Кем өстенә кала бу бәйрәмне үткәрү? Әлбәттә, җирлек башлыгына. Ә финанс мәсьәләләренә килгәндә, бернинди акча бүленеп бирелү юк. Димәк, спонсор эзләргә туры килә. Җирлек башлыгы тегеннән теләнеп, моннан ялынып тапкан акчага ике авылга аерым Сабантуй үткәрү бик күп көч сорый. Күрше Әсәй авылында бер авыл Советы территориясендә ничә еллар инде бер Сабантуй була. Дөнья шушындыйга әйләнгәч, нишләргә кирәк? Ике авыл халкы бердәм булып, уеннарда актив катнашып, бәйрәмнәрне матур итеп оештырып җибәрербез дип өметләнәм. Сабантуйдан соң икенче атнада зурлап авыл бәйрәме үткәрергә дигән план бар.

 

Фото: tatar-congress.org