Тинчурин театры “Галәм. Әгъләм” шигъри-музыкаль спектакленең премьерасына әзерләнә

30 июнь 18:30 сәгатьтә, К.Тинчурин исемендәге Татар дәүләт драма һәм комедия театрында Татарстанның халык шагыйре Мөдәррис Әгъләмовның иҗаты һәм биографиясе буенча “Галәм. Әгъләм” шигъри-музыкаль спектакленең премьерасы була.

Режиссер, әдәби мөхәррир, музыкаль бизәлеш – Туфан Имаметдинов; рәссамы – Лилия Имаметдинова; хореограф – Марсель Нуриев; ут кую буенча рәссам – Илшат Сәяхов (“Алтын битлек” Россия милли театраль премиясе лауреаты). Яшь чикләве – 12+.

Спектакльдә: Резедә Сәләхова (М.Җәлил исемендәге Республика премиясе лауреаты), Артем Пискунов (М.Җәлил исемендәге Республика премиясе лауреаты), Зөлфәт Закиров, Айсылу Мөсәлләмова, Салават Хәбибуллин, Айдар Фәтхрахманов, Эдуард Никитин, Альбина Гашигуллина катнаша.

Спектакль турында:

Татар халкы өчен Шагыйрьләр зур хөрмәткә ия. Милли аңыбыз һәм әдәбиятыбызның нигезен шигърият тәшкил итә. Тукай, Дәрдемәнд, Җәлил, Х.Такташ, Х.Туфан... Мөдәррис Әгъләмов татар поэзиясенең соңгы күренекле вәкилләренең берсе. Аның тормышы драматик борылышлар һәм мәзәк хәлләргә бай моңсу комедияне хәтерләтә. Фәлсәфәче, гыйсъянчы, Нәни Гигант, маргинал, Шүрәле, Әкә, табигать баласы атамалары белән яшәгән атаклы шәхес. Аның тормышы үзенчәлекле Мөдәррисиада. Югалтулар, сызлану, шигърият, мәхәббәт, җор теллелек, хыяллар, авыру һәм өметләр аша сәяхәте аны заман татар поэзиясендә чын Әкә (өлкән) итә.