|
|
Бүген кемнәр туган
|
|
Архив
|
02.06.2021 Җәмгыять
Элек бәрәңге утырту күңеллерәк идеЗаводларда эшләр автоматлаштырылгач, эшчеләрнең кирәге калмаган кебек, бәрәңгене трактор утырта башлаганнан бирле күрше-күлән ярдәменең дә кирәге калмады. Хәзер күпләр трактор, ә кемнәрдер мотоблок белән утырта. Җайлы инде, бер карасаң, кеше мәшәкатьлисе юк. Шулай да элек бәрәңге утыртулар күңелле булып истә калган. “Йомры гәүдәле”не бит ат ярдәмендә, бакча тутырып утырта идек. Колхозда чәчү беткәч, трактор хуҗалык бакчаларын сукалап чыга, шуннан эш атка терәлә, ә ат авылда берничә кешедә генә. Бер урамда бер ат асраучы булмый калмый, шул хайван белән рәттән барлык бакчаларга утыртып чыга идек. Кулалмашка күршеләрне чакырыш. Алар үзләре күтәреп кергән чиләкләргә бакчада инде тутырып куелган капчыклардан орлык бәрәңгесен салып алалар. Сукага җигелгән ат белән сука тотучы сызып киткән буразнага һәркем тизрәк бәрәңге салып калырга ашыга. Кеше күбрәк булган саен, эш тизрәк бетә. Атны бераз ял иттергән арада кемдер мәзәк сөйли, авыл хәбәрләре, дөнья хәлләре дә телгә алына.
Шулай кулалмаш йөреп, берничә көндә бөтен авылда бәрәңге утыртылып бетә. Атлар да бу эштән бераз ял итеп ала. Күмәк эш, ни дисәң дә, күңелле инде.
Шушы көннәрдә бакчаларны сукалый башладылар, тиздән дәррәү бәрәңге утыртырга керешерләр. Безнең күршеләр иртә өлгерә торганын утырттылар инде. Җәй хәерле, имин килсен, бәрәңгедән дә, бүтән яшелчәдән һәм җиләк-җимештән дә мул уңыш алырга булсын.
Галиулла бабагыз. Сарман районы
--- |
Иң күп укылган
|