Апас районында XIII Республика Театраль Сабантуе үтәчәк

20 нче июнь, 11:00 сәгатьтә, Татарстан Республикасының Апас муниципаль районында XIII Театраль Сабантуй үтәчәк. Быел әлеге традицион бәйрәмдә Татарстан дәүләт театры артистлары һәм хезмәткәрләре катнашачак.

Республика театрлары Сабан туе «театраль» дип аталса да, программада көянтә-чиләк белән йөгерү, гер күтәрү, капчык киеп йөгерү, чүлмәк вату, капчык сугышы, милли көрәш һ.б. традицион уен-ярышлар бар. Ярышларда җиңүчеләргә кыйммәтле бүләкләр тапшырыла. Шунысын билгеләп узарга кирәк: көрәштә дәүләт театры артистлары гына катнашырга хокуклы.

Театраль Сабантуйның тарихы 2005 нче елга барып тоташа. Әлеге бәйрәм Кәрим Тинчурин исемендәге Татар дәүләт драма һәм комедия театры инициативасы белән уздырыла башлый. Беренче Сабан туе Биектау районының Әлдермеш авылында үткәрелә. Шуннан бирле бу бәйрәмдә ел саен Татарстанның иҗат коллективларыннан 3 меңләп кеше катнашып килә. Театраль Сабантуй Татарстан дәүләт театрлары арасындагы иҗади элемтәне, бердәмлекне ныгыту, милли бәйрәм Сабан туен популярлаштыру, татар халкының гореф-гадәтләрен саклау максатыннан уздырыла.