“Әни, монда гына йөрим”, дип чыгып киткән иде...

— Авылыбыз тулы этләр, — дип сөйләде Сәфәрдә яшәүче бер апа. — Кечкенә этләр түгел бит, зурлар. 4 яшьлек бала аларга каршы тора алмый, билгеле, олы кешегә ташлансалар да, Алла сакласын, котыла алмассың. Мескен сабыйны чокырга сөйрәп алып барып ашаганнар. Беркем күрмәгән, ишетмәгән. Бала бик кызганыч, бөтен авыл белән елыйбыз... Этләр күп булса да, моңарчы кешене талау очраклары ишетелмәде. Авылыбыз янында Колтырма елгасы ага, көзен шунда кош-кортны харап иткәннәре булды.

 

Малайның үле гәүдәсен күрше хатыны тапкан. Йортларыннан 50 генә метр читтә, чокырлырак җирдә этләр балакайны ботарлап яткан. Хатын шундук телефонындагы камерасын кабызган һәм видеодан күренгәнчә, малай янында 6-7 эт чабышып йөри, хатын аларны куып җибәрә. Ул чакта баланың инде сулышы да, пульсы да булмый.

 

Илнарның әнисе Альбина фаҗига вакытында кер юган.

 

— “Әни, монда гына йөрим”, — дип чыгып киткән иде, — ди бала югалту хәсрәтен татыган ана. — Бу хәл өйдән читтә, юл кырыенда гына булган бит. Улыбызга 22 апрельдә 5 яшь туласы иде. Апасына 15 яшь, урамга гел бергә чыгалар иде, бу юлы үзе генә китте шул. Көннәр җылытты бит, өйдә утырасы килми, велосипедта йөрергә балалар җәйне көтеп тора. Бик җитез, баскан җирендә ут чыгара торган бала иде.

 

Башкортстандагы үзәк өзгеч фаҗига бөтен Россиягә сабак, кисәтү булыр кебек. Халык зарланып торса да, сукбай этләрне аулау акрын эшләнә йә бөтенләй эшләнми. Авыл җирлеге башлыклары: “Фәлән ай элек заявка биргән идек, ауларга килүче юк”, — ди. Бәлки, шушы хәлдән соң, авыл җирлекләре дә, аулау оешмалары да эшен җиренә җиткереп башкарыр. Әмма эш анда гына да түгел. Бөтен Россиядәге сукбай этләрне тотып бетерсәң дә (зоосакчылар фаразлавынча, алар 660 мең чамасы), куярга урын юк. Илдә нибары 114 мең маэмайга исәпләнгән 461 приют эшли һәм алар инде тулы. Шуңа да бу мәсьәләне законны үзгәртеп яисә сукбай этләр өчен яңа яшәү урыннары булдырып кына хәл итәргә мөмкин.

 

Миграновлар гаиләсенең тирән кайгысын уртаклашабыз һәм мондый аяныч хәлләр бүтән кабатланмас дигән өметтә калабыз.

Фото: пиксабай