Колготка киеп балетта бииләр

Социаль челтәрләр аша танышкан дустым Розалия ханым Ибраһимова әледән-әле үзенең “ВКонтакте”дагы шәхси битенә бик кызыклы сәхифәләр яза. Шуның берсен, үзеннән рөхсәт сорап, сезнең игътибарга тәкъдим итәргә булдым.

 

“Табигатьнең көннән-көн уянып, яз исе килә торган чагына җитсәк тә, онытмыйк: гомер көзенә якынлашып, “без бу дөньяда кунак кына бит” дигән сүзләрне еш кабатлаучы буын вәкилләре ич без. Шуңа ишарәләп, уенын-чынын бергә кушып, иремә дә “өйгә кайтып китсәм, бәхил бул” дим. Уйлап карыйм да, яшьрәк чакта иркенләп сөйләшеп тә утырмадык бит инде. Бер-бер артлы балалар туды, аларны ашатырга-киендерергә, мәктәптә, институтта укытырга, башлы-күзле итәргә кирәк дип, дөнья куып эшләдек тә эшләдек. Шулай сизелмичә үтә дә китә икән ул гомер. Хәзер икебез дә лаеклы ялда булгач, сөйләшергә вакыт барлыкка килде. Әле менә үзебезнең яшь чакта кигән киемнәрне искә алып утырдык. Җитмешенче елларда клёш балаклы чалбарлар модасы керде бит. Яшьләр балакларын берсеннән-берсе уздырып киңәйтә башлагач, тегүчеләргә балакларны 40 сантиметрдан арттырмаска кушылган булган ди, имеш. Аның балак очларына, җирдә сөйрәлеп тузмасын өчен, бер тиенлек акчаны бөкләп, беркетеп чыга иде егетләр. Төймәләр тезеп чыгучылар да булды. Ирем: “Мин армиядән дә клёш чалбар киеп кайттым”, – ди. Ничек, мин әйтәм, солдат формасын бозарга ярамый бит?! Ул Ерак Көнчыгышта хезмәт иткән. Хәрби хезмәтен тәмамлагач, поездга утырып китәр алдыннан, барысын да рәткә тезеп киемнәрен тикшереп чыкканнар. “Мин, алдан ук, балагына “клин” өстәп киңәйтелгән солдат чалбарын чемоданның төбенә үк салып куйган идем, үзем исә гадәти, уставча тегелгән чалбарны кигән идем. Хезмәттәш егетләрнең барысы да диярлек клёштан басып торалар. Командирлар ул чалбарларны салдырып алдылар да, уставчаны кияргә куштылар. Поездга утыруга мин модалы теге клёшны киеп куйдым. Малайлар минем элек кигән чалбарымны кискәләп, чалбарларының балакларын киңәйтеп, тегеп кайттылар. Әй, миңа рәхмәт укыдылар инде! Теккән “клин”нарын чылатып, өстеннән шешә тәгәрәтеп “үтүкләп” киеп, модный солдат рәвешенә керделәр аннан”.

 

Розалия Ибраһимова Яшел Үзән районы, Норлат авылында яши. Мин аның бик тә кызыклы сәхифәләрен укып барам. Дөрес, иң кызык язмаларына ул “60+ дусларым өчен” дигән билге куя. Безнең ише 60ы тулып җитмәгәннәргә дә бик кызыклы! Теге “колготка”лы егетләр аңламаса гына. Алар без язганны укымый да укымый инде анысы. Аларның тар чалбары безгә ошамый, ә безнең чор клёшын күрсәләр алар егылып көләрләр иде. Ул тар чалбарны эч-бил турылары шардай кабарган ир-уртасы кешеләр дә киеп куялар әле. Зур корсаклы гәүдәдән нечкә генә аяклар тырпаеп тора. Чөгендерне хәтерләтә, валлаһи. Ир кеше өчен тар чалбарның зыяны турында сөйләп тормыйм. Кем демография өчен кайгыра – монысы алар темасы.

 

Тагын теге биюче егетләргә әйләнеп кайтыйм әле. Татар егетләре биюе ниндидер хәрәкәтләр җыелмасы гына түгел. Татар халык биюе – халыкның холкын да, ир-егетләрнең көч-гайрәтен дә, батырлыгын да күрсәтүче сәнгать ул. “Колготка”лы ирнең гайрәтлелегенә шик-шөбһә туа... Йә чалбарны ирләрчәне кияргә, яисә биемәскә кирәк. Биемичә түзеп булмаса – балетка барырга!

Фото: пиксабай