«Милли мультFest» финишка якынлаша

«Татар-Информ» МА «Милли мультFest» Республика балалар кинофестиваленә багышланган матбугат очрашуы узды. Анда «Татаркино» оешмасы директоры Миләүшә Айтуганова, фестивальнең жюри рәисе Рамил Төхвәтуллин һәм жюри әгъзасы Сергей Киатров катнашты.

«Бөтен республика бу кинофестиваль белән яшәде һәм хәзер без финалга якынлашабыз. 22 апрельдә зур тантана була. Без балалар бакчалары, мәктәпләр һәм студияләрнең үзләрен, үз эшләрен күрсәтү өчен бу фестивальне ничек көтүләрен күрдек. Минемчә, “Милли мультFest” ның перспективалары бик зур", - ди Рамил Төхвәтуллин.

"Эшләрне карый башлаганда, алар бик примитив иде. Тик соңыннан конкурсантлар һәр яңа карау белән шаккатырдылар. Татарстанда анимацияне үстерү потенциалы бар, һичшиксез», - диде Сергей Киатров.

«Милли мультFest» балалар кинофестивалендә Татарстанның 26 районы финалга үткән. Аеручы Тукай, Мөслим, Буа, Арча, Минзәлә, Азнакай, Актаныш районнары актив районнар булган.

«Бу районнарга аерым рәхмәт әйтәсем килә, хезмәткәрләр балалар белән аерым шөгыльләнгәннәр. Моңа кадәр республикабызда шулкадәр районнан балалар анимация, кино һәм компьютер уеннарын ясау белән мавыкканнарын белми идек», Миләүшә Айтуганова.

Миләүшә Айтуганова барлыгы 389 эш килеп ирешкәнен билгеләп үтте. “Бу республика өчен зур сан. Мисал өчен, Халыкара мөселман кинофестиваленә бөтен дөньядан 400дән алып 900гә кадәр гариза килә. Алга таба мультфестивальнең нигезләмәсе үзгәртеләчәк”, - диде ул.

Бәйгедә өч номинация билгеләнгән. Һәр номинациядә беренче урынга йөз мең, икенче урынга 70 мең, өченче урынга 50 мең биреләчәк.