Булат Җиһаншин "Пар чишмә" җыры тууының серен ачты (ВИДЕО)

16 ел элек Булат Җиһаншин башкаруындагы "Пар чишмә" җыры тамашачыны таң калдырган иде. Чын халыкчан, җанга үтеп керә торган җыр. Һәм безгә Булат бу җырның ничек тууының серен ачып бирде.

"Пар чишмә"нең мондый матур җыр булуының сере нәрсәдә,- дип сорасалар, мин: - чөнки җырның идеясе Зөһрә апа Сәхәбиеваныкы, дип әйтер идем. "Күз алдыңа китер - пар чишмә, янында пар каен үсә, ә чишмәнең суы ага-ага да кушыла", - дип сөйләгәч, мина шунда ук ул башкарган "Җидегән чишмә" җырының пейзажы күз алдыма килде. Калганын үзем язып бетердем дә, көйгә салып халыкчан инструменталь аранжировка ясадым.

Бүгенге көндә мин Зөһрә апага бик рәхмәтле, шуңа күрә 2005 нче елда ук «Пар чишмә» җырының хокукларын авторлык оешмасында теркәгәндә - сүзләр авторы итеп Зөһрә апаны да яздым.

Бер концерттан соң ул миңа "апаем" дип эндәште. Мин ничектер аптырап калдым, чөнки Казанда болай әйтмиләр, ә безнең Азнакай якларында нәкъ менә шулай сөйләшәләр бит, малайга да, кызга да, кечерәк булсалар, "апаем" дип эндәшәләр. Зөһрә апа шулай дигәч - ул тагы да якынрак булып китте.

Әниемнең яшь чактан ук иң яраткан җырчысы да бит ул. Бу айда Аллаһ боерса Зөһрә апаның зур юбилее булачак. Мин үземнең гаиләм исеменнән Зөһрә апага сәламәтлек, бәхет, хәерле гомер теләп калам”, дип бүлеште Булат Җиһаншин “Матбугат.ру” белән.