03.04.2021 Спорт

Халыклар дуслыгы йорты оештырган ярышта “Дуслык” татар командасы җиңде

27 мартта Самараның МТЛ «Арена» универсаль комплексында «Милләтләр дуслыгы» дип аталган чираттагы милләтара спорт фестивале үткәрелде.

Чарада татар, башкорт, казах, таҗик, чуваш, белорус, украин һәм башка милләт командалары катнашты. Фестивальне «Юллё» корея барабаннары ансамбле һәм «Алпан» кавказ биюләре ансамбле чыгышы ачып җибәрде.

Спорт фестивалендә катнашучыларны өлкә спорт министры урынбасары Лидия Рогожинская, Самара өлкәсенең Халыклар дуслыгы йорты директоры урынбасары Петр Сучков сәламләделәр. Соңгысы: «Халыклар дуслыгы-2020» юбилейлы спорт фестивале узган елда нәкъ карантин алдыннан уздырылган иде. Быел без янә спорт мәйданчыгында җыелдык, һәм бу бик шәп!» - дип билгеләп үтте һәм катнашучыларны Самара өлкәсендә футбол, волейбол кебек спорт төрләре үсеше тарихына багышланган викторинада катнашырга чакырды.

Самара өлкәсе мөселманнарының региональ Диния нәзарәте рәисе, мөфти Талип хәзрәт Яруллин исеменнән Руслан Мостафин чыгыш ясады: «Кеше гәүдәсе һәм сәламәтлеге - Аллаһы Тәгалә бүләге. Шуның өчен һәркем үзен-үзе кайгыртырга тиеш. Спорт - сәламәтлекне саклауның бер чарасы», - диде ул.

Шобага буенча уенны “Салават Юлаев” башкорт командасы һәм осетиннарның “Алания” командасы башлап җибәрделәр. Башкортлар көчлерәк булып чыкты һәм беренче уен 4:1 исәбенә тәмамланды. Башкорт командасына көч биреп торучылар Башкортостан флаглары күтәреп килгәннәр иде. Бәлки шул да аларга дәрт һәм дәрман өстәгәндер. Тренер Ришат Гобәйдуллин җитәкчелегендәге башкорт командасы, гайрәтләнеп китеп, казахларның “Кайрат” командасын да 9:1 исәбенә тар-мар итте. Ярымфинал таҗикларның “Пайвад” командасы белән 1:0 исәбенә тәмамланды.

Икенче яктан татарларның “Дуслык” командасы да үзенең көндәшләрен җиңеп килә иде. Җәлил Шәрипов җитәкчелегендәге команда башта “Зубр” (1:6), аннан “Дагестан” (0:5), ярымфиналда азәрбайҗаннарның “ЛАСО” командаларын (1:6) җиңеп, финалга барып җитте. Шулай итеп, һәр елдагыча, башкортлар белән татарлар финал уенында кабат очраштылар һәм, һәр елдагыча, кем көчлерәк дигән сорауга җавап эзли башладылар. Беренче таймда беркем дә капкага туп кертә алмады. Икенче таймда татарлар ике гол кертеп, инде ничәнче мәртәбә көчлерәк булуларын дәлилләделәр. Пьедесталның өченче урынына таҗикларның “Пайвад” командасы күтәрелде.

Волейбол турнирында да татарларның “Дуслык” командасы – беренче, чуашларның “Атал Волга” – икенче, украиннарның “Водограй” – өченче урыннарны яуладылар.

Халыклар дуслыгы йорты оештырган ярышта “Дуслык” татар командасы җиңеп килүе очраклы хәл түгелдер, бәлки. Чөнки милләтара чараларда дуслык җиңәргә, оттыручылар булмаска тиеш. Димәк, татарлар команда исемен дөрес сайлаганнар булып чыга. Чөнки быел да “Дуслык” җиңде!

“Халыклар дуслыгы-2021” спорт фестивале җиңүчеләрен котлыйбыз һәм киләчәктә дә бирешмәүләрен телибез.

Гөлнур МУСИНА
Бердәмлек
№ --- | 03.04.2021