Чүплектәге мәхәббәт (Зөлфия Мансур хикәясе)

Тукта, кайда соң әле ул? Кайдан мондый тынлык, тынычлык? Әле генә сугышта иде бит ул. Янында гына мина шартлады һәм... бар да төпсез караңгы чоңгылга очты. Бәлки, ул хәзер исән дә түгелдер, тәне кайдадыр сугыш кырында калгандыр, ә җаны менә җәннәткә эләккәндер. Сугышта шәһит киткәннәрнең җаны туры оҗмахка керә диләр бит!

 

“Озак йокладыгыз”,- диде баягы ягымлы тавыш. Ак халатлы кыз өстенә иелеп, пульсын капшый башлагач кына, Мизхәтнең аңына барып җитте: ул исән, исән икән бит! Күзләре күрә, куллары хәрәкәтләнә, аяклары... тукта, нишләп аякларын тоймый соң әле? Яшь ир, гасабиланып, өстендәге җәймәне кискен хәрәкәт белән ачып җибәрде: бер аягы урынында, бинт белән урап бәйләнгән күлти генә иде...

 

Хатыны сөенеп каршы алмады Мизхәтне. Күргәннәрен сөйли башласа, эче пошкан кыяфәт чыгарып, тыңлыйсы килмәгәнен аңлатты. Төнлә саташып уянганда, баланы куркытасың дип әрләде. Аның күлтиеннән җирәнгәнен дә яшерергә тырышмады. Җитмәсә, кайларга гына барып карамасын, Әфганстанда аягын калдырып кайткан егетне эшкә алырга теләүче табылмады. Ә бераздан... хатыны аңа аерылышырга тәкъдим итте.

Бугазына килеп бөялгән төенне, тешләрен кысып кире төшереп җибәргәч, Мизхәт өеннән чыгып китте. Инде нишләргә, кая барырга?! Бергә хезмәт иткән, бер кулы хәрәкәтсез калып, гарипләнеп кайткан танышына барып керде. Егетләр икесе дә хәер сорашып йөрүне хурлыкка санадылар. Танышы чүплектә “эшли” икән: төрле металл әйберләр эзләп табып, кайсын кайдан сүтеп алып, аннары шуларны күпмегәдер сатып көн күрә. Мизхәт тә аңа иярде.

 

Кызын күрәсе килеп, чираттагы тапкыр үз өенә баруында аны өйгә дә кертмәделәр. Хатыны кабат кияүгә чыккан икән, Мизхәтне пропискадан төшерүен әйтте. Монда килеп, баланың башын бутап йөрмәскә киңәш итте. Җитмәсә, танышында пропискасыз яшәп ятуы өчен дә бәйләнә башладылар. Тәмам күңеле төшкән, тормыштан гайрәте чиккән Мизхәт, барлы-юклы әйберләрен иске сумкага тутырып һәм шулар янына сугышта алган орден-медальләрен салып, яшәргә чүплеккә күчте...

 

 

Фото: rafinaganiullina