Казан Кремлендә Фирдүс Тямаев белән булган хәлгә карата комментарий бирдедәр

Лаеклыларга – бүләкләр

Росгвария оешуга быел – 210 ел. Президент Рөстәм Миңнеханов 26 мартта Росгвардиягә 40 берәмлек җиңел автомобиль тапшыра.

Ул шулай ук, композитор Эмиль Низамов белән дә очраша, аны лауреат исеме алуы белән котлый. Эмиль Низамов 2020 елда яшь мәдәният эшчәннәре арасында Россия Федерациясе Президенты премиясе лауреаты булды.

 

Казанга “архангельләр” көтелә

Татарстанга киләсе атнада Архангель өлкәсе делегациясе визит ясарга җыена. Татарстан Президенты белән Архангель өлкәсе губернаторы очрашуы да планлаштырылган.

– Ике арада 2022 елга кадәр хезмәттәшлек килешүе гамәлдә. Визит кысаларында үзара хезмәтәшлекне киңәйтү турында сүз алып барылачак. Делегация республикадагы берничә завод эшчәнлеге белән урынга чыгып танышачак. “Ак Барс суднолар төзү компаниясе”, “КАМАЗ” җәмгыяте, Казан вертолетлар заводының Архангель өлкәсе предприятиеләре белән хезмәттәшлеген үстерү мәсьәләләре каралачак, – диде Лилия Галимова.

Архангель өлкәсендә 2335 татар яши. Татарстан Президенты Рөстәм Миңнеханов Архангель өлкәсе татар диаспорасы вәкиле Рим Кәлимуллин белән дә очраша.

 

Май да шикәр

Журналистларны азык-төлеккә бәяләр артуы ихтималы борчыды. Бу нисбәттән, Лилия Галимова: “Татарстанда шикәр комына һәм көнбагыш маена кытлык туу янамый. Авыл хуҗалыгы министрлыгы азык-төлек белән тәэмин итүдә кискен хәл чыгар, дип, уйламый. Россия Хөккүмәтендә шикәр комы һәм беренчел ихтияҗдагы азык-төлеккә бәяләр үсешен тоткарлау буенча чаралар планы әзерләнә. Республикада азык-төлек җитештерү һәм тәэмин итү мәсьәләсендә хәвеф юк”, – дип җавап кайтарды.

 

Ипотека туктамас

Татарстан Президенты Рөстәм Миңнеханов ташламалы ипотеканы дәвам итү мәсьәләсен тикшерүне Россия Федерациясе Дәүләт Советы президиумы комиссиясе утырышы көн тәртибенә тәкъдим итәчәк. Россиянең барлык төбәкләренә дә кагылышлы тема бу. Татарстан Президенты Рөстәм Миңнеханов Россия Дәүләт Советы президиумы комиссиясе рәисе буларак, “программаны дәвам итү, шулай ук ставкаларны киметү мөмкинлеге бар”, дигән.

 

Тямаев үпкәләгән

Танылган җырчы Фирдүс Тямаевның Башкортстанның Кыргыз-Миякә районындагы авылда концерты өзелде.

 – Татар артистларына Башкортстанда концертлар куерга рөхсәт бирелмәвенә Татарстан җитәкчелеге нинди мөнәсәбәттә? – дип, “Шәһри Казан” газетасы исеменнән сорау бирдем.

 

– Фирдүс Тямаевның концерты өзелүен сәясәтләштерү кирәкми. Татар һәм башкорт халыклары – тугандаш халык, шунлыктан, мондый очракларга җәмәгать яссылыгында сак бәяләмә бирү сорала. Татарстан Президентының мөнәсәбәте бар, ул һәрвакыт: географик һәм мәдәни яктан безгә башкорт халкы кебек якын халык юк, башкортлар – татарларга тугандаш халык, ди. Артист белән булган бәхәскә республика җитәкчелеге тарафыннан ниндидер бәяләмә бирү урынсыз, – диде Лилия Галимова.