Искәндәр Гыйләҗев татар тарихында якты эз калдырган шәхесләр турында ВИДЕОпроект әзерли

Татар энциклопедиясе һәм төбәкне өйрәнү институты директоры, тарих фәннәре докторы Искәндәр Гыйләҗев татар халкының бөек шәхесләре турында Ютубта видеопроект башлады. Проектны тормышка ашыруда Президент каршындагы татар телен саклау һәм үстерү мәсьәләләре комиссиясе ярдәм күрсәтә.

«Безнең тарихыбыз бай, тарихта тирән эз калдырган шәхесләребез күп. Алар үрнәгендә татарларда горурлык хисен уятасы килә. Безнең институт фактологик материалларга бай. Шуны халыкка үтемле итеп җиткерергә кирәк дигән максат куйдык», — диде институт директоры, проектның авторы «Татар-информ»да узган матбугат очрашуында.

Татар энциклопедиясе һәм төбәкне өйрәнү институты үзенең Ютуб каналында май аена кадәр 5-7 минутлык видеороликлар урнаштырып барачак. Атна саен һәр пәнҗешәмбе көнне бер яңа материал чыгачак.

«Замана кешесе рәтләп китап укымый, интернетта да мәгълүматны беренче секундларыннан җәлеп итсә генә карый. Шуңа күрә кыска ролик эченә мөмкин кадәр тулы мәгълүмат бирергә тырышабыз. Биш минут эчендә кеше турында бөтен әйберне сөйләп бетереп булмый. Шәхескә карата кызыксыну уята алу мөһим», — ди Искәндәр Гыйләҗев.

Бакый Урманче белән башланып киткән проектта Габдулла Тукай, Муса Җәлил, Илһам Шакиров, Мәгүбә Сыртланова, Дәрдмәнд, Мансур Хәсәнов, Галимҗан Ибраһимов, Харис Якупов кебек шәхесләр турында видеолар чыккан. Эшләнәсе роликлар әлегә сер булып кала.