“Ике Илһам бәйрәме”: Казанда Илһам Вәлиев концерты узды (ФОТО)

Аның җырлары арабызда мәңге яшәр. 2 декабрьдә Татарстанның һәм Башкортстанның атказанган артисты Илһам Вәлиев бөек Илһам Шакиров истәлегенә багышлап, Казан тамашачы алдында чыгыш ясады.

 Концертның төп үзенчәлеге – аерым җырчының мәшһүр Илһам Шакировка багышлап җырлавында. Моңа кадәр бер генә җырчының татарның төп баритоны истәлегенә концерт куйганы юк иде әле.

Илһам Вәлиевтан тыш, концертта Рулсан Сәйфетдинов, Ваһапов фестиваленең яшь җырчылары – Гөлсирин Абдуллина, Рәнис Габбазов, Азат Абитов, Зәлилә һәм махсус кунак – Фердинанд Сәлахов та катнашты. Җырлар «Казан нуры» оркестрына кушылып җырланды.

– Бүген сәхнәгә чыккан җырчылар заманында нәкъ менә Илһам Шакировтан хәер-фатыйха алган. Аның истәлегенә багышланган концертлар, һичшиксез, алга таба да булачак, чөнки һәр җырчының исемен мәңгеләштерүнең төп юлы – аның иҗатын яшәтү– диде проектның продюссеры Рифат Фәттахов.

Кичәдә Илһам Шакиров репертуарыннан «Идел буе каеннары», «Җәй айлары», «И, мөкатдәс илем», «Ялгыз көймә», «Өнсә», «Җырланмаган әле безнең җыр», «Чулпан» кебек җырлар, «Наемщик» музыкаль драмасыннан Батырҗан ариясе, «Эшче» операсыннан Нигъмәт ариясе һәм башка әсәрләр башкарылды.

Моннан тыш концертта социаль челтәрләрдә игълан ителгән “Илһамнан-Илһамга” шигъри бәйгесенә дә йомгаклар ясалды. Ә иң мөһиме – килгән һәр кеше дөньядагы киеренкелек турында беразга булса да онытып, җырлар, моңнар белән күңелен тынычландырды.