Чувашиядә Татарстан киносы көннәре уза

27-29 ноябрь көннәрендә Чувашиядә Татарстан киносы көннәре узачак. Әлеге чара Чуваш автономиясенең 100 еллыгын һәм ТАССР төзелүнең 100 еллыгын бәйрәм итүгә багышланган.

Бүген Чабаксарда Чувашия Республикасының Халыклар дуслыгы йортында Татарстан киносы көннәрен ачу тантанасы узды. Сәламләү сүзе белән “Чувашкино” киностудиясе һәм Чувашия Мәдәният министрлыгының электрон документлар архивы җитәкчесе Андрей Абдюшов һәм «Татаркино» оешмасы җитәкчесе Миләүшә Айтуганова чыгыш ясады.

Әлеге чарада шулай ук Чувашия татарларының милли-мәдәни мохтәрияте рәисе Хәйдәр Сафиуллин һәм «Чувашия халыклары Ассамблеясы» Советы рәисе Лев Кураков та катнашты.

28 ноябрьдә Татарстан киносы көннәре Чувашиянең Комсомольск районы Урмай авылында дәвам итәчәк. 29 ноябрь көнне исә чара Батыр авылында тәмамланыр дип планлаштырыла.

Татарстан киносы көннәре кысаларында «Әпипә», «Остазбикә» һәм «Нигез йорт» фильмнары күрсәтеләчәк.

«Татаркино» җитәкчесе Миләүшә Айтуганова сүзләренә караганда, Татарстан киносы көннәре Россия төбәкләрендә даими үткәрелә. Соңгы тапкыр мондый чара Новосибирскида уздырылган.

«Әлеге чара илдә татар мәдәниятен популярлаштыруга юнәлдерелгән зур программа. Төбәкләр белән мондый кинопрограммалар алмашу инде күркәм традициягә әверелә. Февраль аенда Татарстанда чуваш киносы көннәрен үткәрү планлаштырыла", - дип билгеләп үтте Миләүшә Айтуганова.