11 бала әнисе Лилия Гыйльметдинова: «Иремне югалтканда, кечкенә балама 5 яшь иде…»

–  Ирем Дилфас белән авылдашлар идек. Бер-беребезне бик яратып өйләнештек. Ул чакта мин тракторда эшли идем. Кияүгә чыккач, эшемне ташладым. Озак та үтмәде, бәхет эзләп, Себергә чыгып киттек. Ризык йөртә шул кешене. Ул чакта беренче балабыз туган гына иде. Берничә елдан кире кайтырга туры килде, – дип сөйли 65 яшьлек Лилия Гыйльметдинова. – Авылымны бик сагындым. Әтиебез үлеп киткәч, әни ялгыз калмасын, диештек. Бер бала белән китсәк, өч сабыебызны ияртеп, туган йортыма кайтып кердек.

 

Лилия ханым, авылга кайткач, балалар бакчасына пешекче булып урнаша. Шунда эшли.

 

– Балага уза бардым, таба тордым. Эшләмичә өйдә утырдым дип тә әйтеп булмый – элек декрет яллары озак бирелми иде. Тизрәк эшкә чыктым. Шөкер, сабыйларым сәламәт булды. Йөрәкле булганмын инде, табарга курыкмаганмын, – ди ул.

 

Заманында Татарстанның беренче Президенты Минтимер Шәймиев аңа «Ана даны» медале тапшыра. Шулчакта бергә төшкән фотоларын зурайтып, шкафка куялар. Ире Дилфас абый хатыны белән бик горурлана торган була.

 

Балалары әти-әни йөзенә кызыллык китерми. Тик менә иренең иртә китүенә Лилия ханымның йөрәге әле дә әрни.

 

– Рәхәтләнеп яши алмадык. 27 ел бергә торып калдык. Балалар үскәнен күреп, оныклар өчен шатлана алмады. Рәхәт яшәтте. Сәламәтлеге мактанырлык түгел иде. Үпкәсенә операция ясатты. Кинәт китеп барды. Иремне югалтканда, кечкенә балама 5 яшь иде. Җиңел булмады. Ул чакта ике баламның үз тормышы иде. Калганнары минем белән. Туганнарым ярдәм итте. Бердәм, дус-тату булып, ятимлек ачысын бер-берсенә сиздермәскә тырышты балаларым. Миңа яшәр өчен көч бирүче булды алар, – ди Лилия ханым.

 

Аның йөрәгендә бала хәсрәте дә бар. 33 яшьлек улын югалта ул. Бу хакта сөйли дә алмый, искә төшермәскә куша.  Калган балаларының озын гомерле булып, бәхетле яшәүләрен тели.

 

– Ун балам, ун оныгым, бер киленем, биш киявем бар.  Әле тагын өч улымны өйләндерәсем, кызымны кияүгә бирәселәрем алда. Дөньяда үземне бик бай кеше дип саныйм. Бәхет – балаларда икән ул. Аларның көн саен хәлемне белүенә  дә сөенәм. Бик кадерләп торалар. Якын торучылары бер йомышым булса да, тизрәк кайтып җитә. Хәзер бит ышкый торган телефон бар. Кеше күренә торган итеп тә була аны. Бөтен балам белән сөйләшеп торам. Рәхәтләнеп аралашабыз, – ди ул.

 

Хәзерге заман яшьләренең бала алып кайтмауларын карата фикерен дә белештек.

 

– Хөкүмәттән ярдәм күп. Безгә бала тапкан өчен акча бирмәделәр. Сабыйларымны мәктәпкә әзерләр өчен икешәр бакча бәрәңге, суган үстереп, шуны Актанышка илтеп сата идек. Күтәреп алып барып йөрдем. Акчаны эшләп таптык. Тик мин узган гомеремә шөкер кылам. Элеккеге чакка кайтып, ни дә булса үзгәртәсеңме дисәләр, ризалашмас идем. Авырлыгын да татыдык, хәзер исә балаларымнан игелек күрәм, – ди.

 

Лилия ханым үзенең балаларының исемнәрен әйтмәде. Буталып бетәсез, алайса дип котылды. Шуннан соң өстәп тә куйды.

 

– 11 баламның барысына да исемне ирем сайлады. Ошатмаган чаклар да булгалады. Үземнең әти дә миңа Роза кушам дип чыгып киткән, Лилия дип куйдырып кайткан, – ди ул. Үзе әйтмәсә дә, белдек: Лилия ханым Инстаграмда «Дневник Татарина» блогын алып баручы Рәмиснең әнисе икән. Әнисеннән улы хакында сорашмыйча булдыра алмадык.

 

– Шундый җор телле инде ул. Кечкенәдән әллә ниләр уйлап чыгара иде. Фантазиясе көчле. Миңа охшаган. Мин дә мәктәптәге бәйрәмнәрдә әллә ниләр кылана идем, – ди ул. Казаннан ук шалтыратканны белгәч, авылларын сулы иткән өчен Актаныш районы хакимияте башлыгы Энгель Фәттахов белән элек авыл җирлегендә эшләгән Рәйхан Галимҗановага  рәхмәтен белдерергә ашыкты.

 

– 5 чакрым җирдән торба сузып, безне сулы иттеләр. Рәхәттә яшибез хәзер. Авыл да шәһәрләшә башлады, – ди ул.