"Милли киемнәр, Татарстан символикасы, мәчет, татарча җырлар... Ә шакмаларда ПЬЯНЧУГА сүзе..."

Бу җомгада "Поле чудес" тапшыруы ТАССРның 100 еллыгына багышланган иде. Бу уңайдан "Матбугат.ру" инстаграмында 200дән артык комментарий яздылар, дип хәбәр иткән идек. Күбесенә ошаган. Ләкин тискәре тәэсирләр алучылар да юк түгел. Мисал өчен "Татар радиосы"ның элеккеге баш мөхәррире Айваз Садыйровта, үзе әйтмешли, хәтта "гарьлек хисе" туган. Бу хакта ул инстаграмда болай дип яза (үзгәртми бирәбез):

"Республикабызның 100 еллыгына багышланган Поле Чудес тапшыруының кадрлары бн тулды инстаграм. Татар җырлары, көйләре үзәк телеканалда яңгырау горурлык уятты халыкта, шул исәптән миндә дә. Кадрларның берсендә безнең талантлы егетебез Айнур Моратов гармун уйный, ә аскы шакмаларда П**Н*УГА хәрефләре бирем сүзен хасил итәргә тора. Минем шунда ук башыма, бер сүз килде. Уйлаган сүзем өчен оялып: булмас, дип куйдым. Бераздан, неужели, дип тапшыруны карап чыккан идем, ачу катнаш, гарьлек хисе туды дисәм, аз булыр. Бер тапшыруга 3 бирем инде ул. Шунда да бер бирем җавабы итеп ПЬЯНЧУГА сүзен сайлаганнар. Кадрда милли киемнәр, Татарстан символикасы, кечкенә сувенир мәчет, татарча җырлар, бәйрәм рухы... Ә шакмаларда ПЬЯНЧУГА сүзе. Тапшыру авторлары тарафыннан киткән уйланмаган ялгышлыкмы бу, мәгънәсезлекме, әллә тирәнгәрәк яшеренгән бер-бер уй, 25нче кадр ятамы биредә?..." - дигән АйвазСадыйров.