Буадагы бер хуҗалыкта меңнән артык каз һәм үрдәкне яндырганнар

Фермер җәй башында мең дә туксан дүрт баш каз бибие алып үстергән. 27 сентябрьдә Чувашиядән 126 үрдәк тә сатып ала. Берничә көннән үрдәкләре үлә, соңрак казлары да кырыла башлый. Шуннан фермер ветеринарларга мөрәҗәгать итә. Буа ветеринария берләшмәсе җитәкчесе Камил Әхмәтов “ШК”га хәбәр иткәнчә, 21 көнгә карантин игълан ителгән. Башка хуҗалыклардагы кош-кортлар да контрольдә тотыла.

 

– Бу күңелсез хәл Чувашиядән китерелгән үрдәкләрнең ветеринария белешмәсе булмавы аркасында килеп чыкты. 45 көнлек үрдәкләр чирле булган. Шуннан авыру казларга да күчкән. Ветеринария белешмәсе булган очракта да Мөдәррис Хәйруллов аларны ике атна карантинда тотарга тиеш иде, ә ул башта ук аларны казлар янына җибәргән. Анализлар каз-үрдәкләрдә кош гриппы булуын күрсәтте. Башта үрдәкләрне үзе генә дәвалап караган, әмма бу күпкә җитди булып чыкты. Барлык кош-кортларны да укол кадап йоклаттык та яндырдык. Кошлар торган утарны дезинфекцияләдек. 15 см тирәнлектәге җирен кырдырып алдык, шул участокка сүндерелмәгән известь сибәчәкбез, – дип сөйләде ул безгә.

 

Авыл халкына кош-кортларын урамга чыгармаска, ябык бинада тотарга кушылган. Кошлары үлә калса, шунда ук ветеринарларга мөрәҗәгать итәргә кирәк.

Исегездә булса, моннан өч ел элек Лаеш кошчылык комплексында тавыкларда кош гриппы таралган иде. Аның аркасында 400 меңнән артык тавыкны яндырдылар. 2018 елда да кош гриппы буенча Апас, Чүпрәле, Тәтеш, Кама Тамагы, Кайбыч районнарында карантин игълан ителде.

 

Кош гриппын булдырмый калу өчен:

ветеринар-озату документларыннан башка кош-корт сатып алмаска;

аны ике атна көн аерым тотарга;

кош-корт алганда сатучыдан документларын таләп итегез. Аның каян китерелгән, нинди вакциналар ясалган, нинди ветеринария эшкәртү процесслары узганлыгы белән кызыксыныгыз;

 

Кош гриппының беренче билгеләре: йокымсырау, кикрикләр зәңгәрләнү, кош-кортның йөреше үзгәрү, эче китү, температурасы күтәрелү һәм гырылдый башлау.

Фото: http://buinsk-tat.ru