"Тагын бер легенда китте: кабер, туфрак һәм көрәк. Даһиларны исән чакта күрә белергә кирәк"

Хәмдүнә Тимергалиеваның китүе бар кешене тетрәндерде. Иҗат әһелләре үз хисләрен гади сүзләргә генә сыйдыра алмыйча, легендар җырчыны сагынып шигырьләр язалар. "Матбугат.ру" шул шигырьләрне барлады. Сания Гәрәбә, Гөлнур Айзат һәм Әбри Хәбриев каләменнән:

СОҢГЫ ШӘМ
(Җырчы Хәмдүнә Тимергалиева истәлегенә)

Ярсу шәмдәй, яндың дөрли-дөрли,
Янган саен, артты ялкының.
Каршы тордың ачы җилләренә,
Җиңәм диеп бозлы салкынын.

Якты шәмдәй, яндың армый-талмый,
Ялмый-ялмый җанның ярасын.
Ялгыз калгач, балавыздай тамып,
Эреттеңме төннең карасын?

Затлы шәмдәй, яндың җырлый-җырлый
“Чияле тау”, “Кәккүк”, “Җомга”ны.
“Сары чәчәк”, “Танго”, “Ядкар”еңә
Ничә буын кушылып җырлады!

Горур шәмдәй, яндың сыза-сыза,
Сүнмәскә дип, оча-талпына.
Соңгы йөрәк тибешеңә кадәр
Бар җылыңны биреп халкыңа.

Татар иле матәм кайгысында,
Әйтерсең лә соңгы шәм сүнә...
Сүнмәс балкыш булып моң күгендә
Яшьнәрсең син, җырчы Хәмдүнә!

Сания ГӘРӘБӘ
14.09.20

Киттең.... Картаймыйча... мәңге яшь күңелле килеш...
Тетрәтеп татар дөньясын
Шулай китәләрмени?!
И, Хәмдүшебез син безнең,
Ятим итәләрмени?!
Синдәй көчле җырчыбызга
Килешми әле бер дә!
Яңа китабыңны котлап
Җырлыйсы иде бергә.
Ник, нигә шулай ашыктың,
Булдымы сәбәпләре?
Кем уйлаган: сентябрьдә
Сугар дип сәгатьләрең?!
Борай кызы, буран кызы,
Меңләгән җырың ятим.
Бүген күзләрендә гел яшь,
Синсез ятим милләтем.
Гали дә,Торна Зариф та
Көтмәсләр сине бүтән.
Таңда яңгыр хәбәр итте:
Хәмдүнә киткән... киткән!
Язмышның сынауларына
Бирешмәгән дә идең.
Я, нигә үлем алдында
Бүген башыңны идең?!
Сәхнәләрне дер селкетеп,
Тәрәзәләр зеңләтеп,
Кояшлы алтын бу көзгә
Кергән идең гөрләтеп...
Их,Хәмдүнә, легендабыз,
Озатабыз еракка.
Гүрләрең киң.якты булсын,
Урыннарың – оҗмахта!

Гөлнур Айзат. 14.09.2020.

Даһилар җирдә сирәктер...
Алар безгә бик кирәк!
Даһиларны исән чакта
Күрә белергә кирәк!

Кайчак дорфа булсалар да,
Таштан түгел ул йөрәк!
Туры сүз белән чеметсә,
Тыңлый белергә кирәк!

Рәнҗетү, кимсетүләргә
Түзгән, сынмаган "тирәк"!
Үз сүзләрен, үз фикерен
Җырлап әйтүче сирәк!

Ялагайлар гел мактала,
Хак сөйләүче таптала!
Тапталдың! Тик изелмәдең -
Күңел шуңа шатлана!

Горур булдың, үрнәк булдың,
Боевой хатын идең...
Җәннәтләрнең түрләрендә
Балкысаң иде үзең!

Тагын бер ЛЕГЕНДА китте...
Кабер... Туфрак... һәм көрәк...
Даһиларны исән чакта
Күрә белергә кирәк...

15.09.20. Әбри Хәбриев