Декретта утыручы Җәмиләсен Башкортстан һәм Татарстан халкын үз авызына каратып куя белә

Быел да Җәмилә апагыз бәрәңгене берүзе чүпләде бугай. Алырга дигәндә беркем кайтмый, ашарга дигәндә барысына да кирәк. Телефоннан рәхәтләнеп сүкте ул көнне кызларын. Гөмбә җыярга барган иде, анда да бәхетен кәҗә сөзгән. Күрше Фәридәләр инде әллә кайчан җыеп тозлап куйган, ә Җәмилә көне буена бер гөмбә дә таба алмый кайтты. Аның каравы 1 сентябрьдән аның каникуллары башланды – оныклар шәһәргә укырга китте. 

 

Кайсы Җәмилә ул дисездер. Инстаграмдагы инде. Чәчәкле халатларын киеп, чуар яулыкларын бәйләп куеп, авылдагы мәзәк хәлләрне сурәтләгән вайннары шактый лайк җыя аның. Җәмилә уйлап чыгарылган исем. Үзе ул – Уфа шәһәрендә яшәүче татар кызы Эльвина Сибагатова.

 

Блогер Эльвина кечкенәдән сәхнәдә скетчлар уйнап, җырлап-биеп үскән. Театр артисты булу хыялы Стәрлетамак сәнгать техникумының театр бүлегенә китерә. Аны тәмамлаганнан соң, үзенең туган ягы – Бүздәк районында режиссер булып эшли. Анда эшкә кергән мәлендә Салават шәһәренә театрга чакыралар. Әмма әти-әнисенең кызларын ерак җиргә чыгарып җибәрәсе килми, апа-абыйлары янәшәсендә булуын телиләр. Бүздәктә хезмәт хакы аз булгач, вәгъдә ителгән фатир да бирелмәгәч, Уфага китеп бара. Анда кибетләр челтәрендә управляющий булып эшли. 

 

Бүген Эльвина декрет ялында. Ире Илгиз белән бер кыз һәм бер ул үстерәләр. Аязга – 4 яшь, Айгизәгә – 1 яшь тә 8 ай. Блогер булу хыялы күптән булса да, балалар белән ялда утырганда кызыклы видеолар төшерергә илһам килә. Баштагы вакытларда видеолар төшерә дә аларны бетереп бара. 

 

 

– Йә үзем, йә тавышым ошамый иде. Йә булмаса кызык түгел дип күңел төшә иде. Нәрсә төшерәсен дә белмичә азапландым. Оялу дигән нәрсә дә бар иде. Бер ел тирәсе шулай үтеп тә китте. Яңа елга кергәндә, кабат видеолар төшерә башлаячакмын дип үземә сүз бирдем һәм ныклап тотындым. Аныңча бик күп блогерларның эш алымнарын карап-күзәтеп бардым, – ди Эльвина. 

 

– Йөзне үзгәртә торган төрле кушымталарны кулланып карадым. Җәмилә “битлеген” шунда ук ошаттылар. Әле ул вакытта исеме юк иде. Язылучыларым арасында нинди исем килешер икән дип сораштыру үткәрдем. Алар тәкъдим иткән исемнәр арасында күпчелек Җәмиләне сайлады. Гел нәрсәдән булса да канәгать булмыйча зарланып йөри торган хатын образы ул. Фатыйх исемле ире дә бар. Күршеләре Сәкинәттәй дә кадрга эләгә. Видеоларны куймый торсаң, Җәмилә белән Фатыйх кая дип сорап яза башлыйлар. 

 

Блогерның хейтеры булмый калмый. Эльвинага да тискәре фикерләр язучылар бар. Баштарак аларга ияләшергә авыррак булган, кәефе төшеп елап та алгалаган. Хәзер инде бик борчылмый, алар өчен аерым “битлек” киеп, шулай ук вайннар төшерә. 

 

Вайннарны алдан әзерләнмичә, тиз генә бшка нәрсә килде, шуны төшерсәң, күпкә кызылырак килеп чыга һәм аларны күбрәк тә ошаталар, ди блогер. Шунысы да кызык – Башкортстанда яшәүче Җәмиләне Татарстанда күбрәк беләләр икән. Эльвинаның үзен урамда танучылар да күп. Шул Җәмилә аркасында дусларга да баедым, ди ул.