03.09.2020 Шоу-бизнес

Татар эстрадасында бала табу күренеше булган КЛИП чыккан

Татар эстрадасының яшь җырчысы Анастасия Макарованың “Әнием” исемле җырына төшерелгән өр-яңа клибы чыкты. Клип, чын мәгънәсендә, үзенчәлекле! Анда бала тудыру йортындагы чынбарлык тарих сурәтләнә. Бу уңайдан җырчының продюсеры Рушана белән сөйләштек.

- Рушана, бала табу процессын күрсәтергә батырчылык иткән парны кайдан таптыгыз?

- Беләсезме, мин бу клипта нәкъ менә чын хәлләрне күрсәтергә теләдем. Кызганыч, күпләр курыкты, клипта күренергә теләмәде. Озак эзли торгач, Ростовтагы бер видеограф белән таныштым. Ул миңа дүрт пар тәкъдим итте, мин шуларның берсен сайлап алдым. Нәтиҗәдә видеоязманы сатып алдык.

- Ростовта яшәүче пар, мөгаен, рус милләтеннәндер. Алар җырның тематикасы белән кызыксындымы?

- Алар телне аңламый, шуңа күрә җыр текстын рус теленә тәрҗемә иттек. Бик ошаттылар.

- Мәскәүдә бала табуны төшерү клиплары бихисап. Бездә – бу яңалык. Ничек кабул иттеләр?

- Бик күп тәнкыйть ишетергә туры килде. Клипны хәтта ТНВның сәнгать советы да кабул итмәде. Шөкер, башка телевидениеләр алды. Клипта нәкъ менә чын хис-кичерешләрне күрсәтергә теләдек.

- Кыз бала тудымы, ир баламы?

- Кыз. Диана исемле, ялгышмасам. Без бит кызлы пар эзләдек. Янәсе Настяның туган мизгелләрен күрсәттек.

- Рушана, мондый клипны төшерү ничә сум тора?

- Аның бюджеты якынча 100 мең сум. Ләкин алдагы ике клип белән чагыштырганда, бәясе күпкә азрак. Моңа кадәр төшергән клипларыбыз шактый кыйбатлы булды.

- Настя – милләте буенча рус кызы. Татар телен беләме?

- Аңлый. Аның белән сүзләрнең дөрес әйтелеше өстендә ныклап эшлибез. Мин үзем дә татар эстрадасын бик яратам. Бөгелмәдә музыка мәктәбен тәмамладым, җырчы булырга хыялландым. Тик насыйп кына булмады. Менә хәзер Настя хыялларымны тормышка ашыра.

- Киләчәктә рус эстрадасына чыгу планда бармы?

- Әлбәттә. Без рус телендә дә җырлар яздырабыз. Тик башта туган якта күренергә, мондагы тамашачының мәхәббәтен яуларга исәп. Аллага шөкер, инде үз тамашачыларыбыз бар. Иҗатыбызны яратып кабул иткән һәркемгә рәхмәт.

Эльвира ШАКИРОВА
Шәһри Казан
№ --- | 03.09.2020