МӘ, МӘЗӘК!

Рифма

Бервакыт язучылар автобуска төялеп Чаллыга барганда очраган һәрнәрсәгә рифма табып, берәр строфалы шигырь чыгаралар икән. Тракторга да, Камазга да, күпергә дә, хәтта юл читендә торган скриперга да рифма табылган. Шлагбаум очрагач кына көймә комга терәлгән. Рифма осталарын – шагыйрьләрне драматург Туфан Миңнуллин «коткара».

Чаллыларга барган чакта

Очрады шлагбаум;

Шлагбаумны узганда

Чишелде ыштан баум, – ди ул.

Кушамат

Марсель Сәлимҗанов Туфан Миңнуллинның авылда тууына һәм авыл турында язуына ишарәләп драматургка «Аграрий» дигән кушамат тага. Туфан да җавапсыз калмаска тырыша, режиссерны «Асфальт малае» дип йөртә.

– Таккан кушаматым әлләни уңышлы булмаса да, ул Марсельнең кәефен бозарга җитә иде, – ди Туфан абзый.

Үзеңә кайтып уйна

Туфан Миңнуллин Мирсәет Яруллиннар дачасының баскычында Мирсәет гармунында ниндидер көй шыгырдатып маташа икән. Үз кишәрлегендә казынып йөргән Мирсәет, эшеннән туктап:

– Туфан, гармун кызганыч түгел, син аны алып, үз дачаңда уйна әле. Югыйсә, Мирсәет шулай уйный, дип уйлаулары бар, – дигән.

Йокы килгәндә

Дәүләт Советы сессиясе утырышында эчпошыргыч мәсьәлә каралганда, депутат Туфан Миңнуллинны йокы баскан. Башы авып-авып китә икән. Моның янәшәсендә бу хәлне күреп утырган Разил Вәлиев:

– Чишенеп ят, Туфан абый, – дигән киңәш биргән.

Телефоннан сөйләшү

– Туфан абый, исәнме. Мөршидә әле бу, авылдашың.

– Исәнме, Мөршидә.

– Тыңла әле, Туфан абый:

Мин киткәчтен кемнәр сөяр

Син сандугач баласын?

Җырмы бу, Туфан абый?

– Җырдыр. Җыр куплетының соңгы ике юлы.

– Әгәр җырның соңгы ике юлын гына җырлап булса, нигә аны дүрт юллы итеп язалар?

– Минем берәр гаебем бармы әллә, Мөршидә?

– Гаебеңне аннары әйтермен. Тагын бер сорауга җавап бир әле башта. Син йокыдан сәгать ничәдә торасың?

– Нигә сорыйсың?

– Әйт инде, ояты юктыр. Сәгать тугыздамы?

– Син бигрәк инде... Җидедә уянам.

– Ә мин алты тулганда.

– Син уңган хатын шул.

– Син дә берәр көн алты тулганчы уян әле. Уян да, Мәскәү гимынын һәм Татарстан гимынын тыңла.

– Шуннан?

– Нигә Татарстан гимынының соңгы ике юлын гына уйныйлар. Тутырып уйнарга куркалармы, оялалармы? Нәрсә, татарга ике юлы да җитә дип уйлыйлармыни? Тыңла да миңа шалтыратырсың. Сау бул.